“Anigu; Muuse, Xataa Ardaagii Geel-jiraha Labadayada Oo Qudhi Wada Seexannay Oo Annagoo Afar Caanno-maal Qatan Hilib Sakaaro Ku Dubannay”

0
176

 “Maanta Waxaan Idin Hor-Joogaa, Anigoo Ah Madaxweynihii Qarankan, Isla Markaana, Aan Naftayda Cuud, Cod & Cudud Toonna, Idiinka Rabin”

 “Anigu Waxaan Ummadda U Dooray, In Hogaamiyihii I Bedeli Lahaa, Uu Noqdo Muuse Biixi Cabdi  Oo Ah Siyaasi Waayo-arag Ah, Oo Ay Ku Duugan Tahay Karti, Hufnaan Iyo Aqoon Badani”

+++++++++++++++++

“Muuse Biixi Ciyaar Iyo Caadifad, Midna Kuma Dooran, Ee 31-Kii Sanno Ee Noloshayda U Dembeeyey Wuxuu Ka Mid Ahaa Raggii Garabka Iyo Gaashaanka Ii Ahaa”

Nuxurka Khudbad Dardaaran iyo Hoga-tus Ah Oo Madaxweyne Siilaanyo Ka   Taageerayaasha Kulmiye uga Jeediyey Fagaaraha Kheyriyadda Ee Burco, Kana Sheekeeyey Shakhsiyadda Murashaxa KULMIYE iyo Sifooyinka Uu Ku Xushay

Burco(Hubaal):- Madaxweynaha Somaliland Axmed Maxamed Maxamuud (Siilaanyo), ayaa Olalaha doorashada Madaxtooyada ee Xisbiga Kulmiye shalay kaga qaybgalay Fagaaraha Khayriyada magaalada Burco ee xarunta gobolka Togdheer, halkaas oo uu Kumannaan Taageerayaasha Kulmiye ah oo isugu soo baxay uu khudbad uga jeediyey, isla  markaana ka sheegay inay wakhtigii uu musharraxa ahaa 2010-kii ugu dambaysay Fagaarahaas inuu ka hadlo. Waxaanay noqon doontaa Khudbaddani tii ugu dambaysay ee Olole ee Siilaanyo isagoo xilka haya ka jeediyo Burco.  Khudbadda Madaxweyne Axmed-Siilaanyo ka jeediyey Maalinta ololaha Xisbil-xaakimka Kulmiye ee uu Aasaasay isagu oo uu u sharraxan yahay doorkan Musharrax Muuse Biixi jagada Madaxweynennimo ee Xisbigaas, ayaa ugu baaqay taageerayaasha inay amniga iyo kaladambaynta ilaaliyaan, isla markaana u codeeyaan si nabadgelyo ah doorashada Madaxtooyada ee u muddaysan 13-ka bisha dambe, isna barbar-taagaan Musharraxa Kulmiye Muuse Biixi Cabdi. Khudbadda Madaxweyne Axmed-Siilaanyo ka jeediyey Burco u dhignayd sida tan:- “Waxaan uga mahad-celinayaa, guud ahaan, Shacbi-weynaha Somaliland, yuhuuntii, yidi-diilladii, iskaashigii iyo wada-shaqayntii, ay isla bar-bar taageen Xukuumadda Xisbiga KULMIYE, ee aan Odayga u ahay.

Anigu, waxaan ummadda u dooray, in hogaamiyihii i bedeli lahaa, uu noqdo Musharaxa Madaxweynaha ee Xisbiga Kulmiye, Muuse Biixi Cabdi, kaas oo ah siyaasi waayo-arag ah, oo ay ku duugan tahay karti, hufnaan iyo aqoon badani. Dhammaan Taageerayaasha faraha badan, ee Xisbiga KULMIYE, ee isugu soo-baxay, Fagaaraha Khayriyada Burco, waxaan idiin soo gudbinayaa salaan Xambaarsan Nabadgelyo iyo Naxariis Eebbe Asalaamu Calaykum Wa Raxmatullaahi Wa Barakaatuhu. Farxad weyn bay ii tahay, in aan dib ugu soo noqdo goobtan, oo ay iigu dambaysay, wakhti aad u dheer. Xasuus dheer, ayey igu leedahay khayriyadan Burco, oo aan Taageerayaasha Xisbiga Kulmiye, wakhtiyo badan, oo kala duwan, kala hadli jiray, aniga oo ah Musharrax Madaxweyne. Eebe Mahaddii, maanta waxaan idin hor-joogaa, aniga oo ah Madaxweynihii Qarankan, isla markaana, aan naf-tayda cuud, cod iyo cudud toonna, idiinka rabin.   Xilkan Madaxweyne, ee aan wareejin doono muddo yar ka dib, kuma iman xoog iyo xeelad toona. Hase-yeeshee, waxaan ku haaneeday codkii ay ii hibeeyeen Taageerayaasha Xisbiga KULMIYE, ee Lixda Gobol Doorasho ee Dalka, ku kala sugan. Dhacdadan taariikhiga ahi, waxay saamayn ku leedahay, noloshayda qayb ka mid ah, isla markaana maaha, mid aan abidkay ilaawi karo.

Mudanayaal iyo Marwooyin, Aniga oo munaasibaddan ka faa’iidaysanaya, waxaan jecelahay, in aan halkan uga mahadceliyo, Taageerayaashii habeen iyo maalin, mudada dheer,  hiilka iyo hooda, ila hareera taagnaa. Mar labaad,  waxaan si weyn ugu mahad-celinayaa dhammaan Wax-garadkii, Aqoon-yahankii, Waayeelkii, Haweenkii iyo Hal-doorkii Dhallinyarada, ee codkoodu suurtagaliyey, in uu KULMIYE guulaysto, isla markaana aan noqdo Madaxweynaha Jamhuuriyadda Somaliland.     Sidoo kale, waxaan uga mahad-celinayaa, guud ahaan, Shacbi-weynaha Somaliland, yuhuuntii, yidi-diilladii, iskaashigii iyo wada-shaqayntii, ay isla bar-bar taageen Xukuumadda Xisbiga KULMIYE, ee aan Odayga u ahay.

Mudanayaal iyo Marwooyin, Waa hubaal, in Xisbiga KULMIYE, uu ku guulaystay hoggaamintii talada dalka, mudadii uu dalka dawladda ka ahaa. Waxa hubaal ah, in Taageerayaashii noo codeeyey, aanay guul-daraysan, oo aanay is-ciil kaambiyeyn, isla markaana, aanay fartoodii marnaba hiifayn. Waxaan leeyahay, KULMIYE wuu guulaystay, dhammaanteena waynu guulaysannay.

Duco-qabayaal, Waxa Lib idiinku filan, in aan taladiinii, iyo tacabkiinii midna aan lagu khasaarin. Waxa Lib idiinku filan, in Xukuumaddii Xisbigii aad doorateen, la mahadiyey. Abaalkii aad, aniga iyo Xisbiga KULMIYE u gasheen, waxaannu ku gud-nay, in aanu dalkii ka hirgelinay horumar balaadhan, iyo is-beddel laxaadle, oo sida cad-ceeda u ifaya. Waxaannu ciwad-celin idiinka dhignay, in aanu fulinay barnaamijkii Xisbiga KULMIYE, iyo ballamihii aanu idiin qaadnay. Waxaan leeyahay, Taageerayaasha Xisbiga KULMIYE, sidii aad noogu listeen, ayaanu idiinku hambaynay.

Mudanayaal iyo Marwooyin, Xilkii aad ii doorateen, waxaan ummadda Jamhuuriyadda Somaliland, aan ugu maamulay, si caddaalad, sinnaan iyo xaqsoor leh. Xaasha, Deegaan, deegaan kama xigsan, gobolna, gobol kale, kama jeclaysan, isla markaana, ma kala dhaweysan, intiinii ii codaysay, iyo intii iga codaysay. Waxaan dalka ku soo maamulay, muddadii aan qarankan, hoggaamiyaha ka ahaa, dulqaad, dad isku-wad, dan guud jacayl, dir-sooc la’aan, danaysi nacayb, iyo dareen Oday-nimo.

Mudanayaal iyo Marwooyin, Dhawaan, waxa dalka ka dhici doonta, Doorashadii Madaxtooyada Jamhuuriyadda Somaliland, taas oo lagu dooran doono, Madaxweynihii i beddeli lahaa, isla markaana Qarankan, hoggaamin lahaa shanta sanno ee soo-socota. Madhaxa iyo Max-suulka doorashadani, waa mid saamayn weyn ku leh, nolosha iyo mustaqbalka Shacabka iyo Muwaadiniinta Somaliland. Sidaa darteed, waxa waajib ku ah, ruux kasta oo leh xaq cod-bixineed, in uu u miidaan dayo codkiisa. Waxaan idiinku baaqaya, in aad doorashada ku gashaan nabadgelyo iyo deganaansho. Sidoo kale, waxaan idiinku baaqaya, in aad ix-tiraamtaan aragtiyaha iyo afkaaraha idinka soo horjeeda.  Anigu, waxaan ummadda u dooray, in hogaamiyihii i bedeli lahaa, uu noqdo Musharaxa Madaxweynaha ee Xisbiga Kulmiye, Muuse Biixi Cabdi, kaas oo ah siyaasi waayo-arag ah, oo ay ku duugan tahay karti, hufnaan iyo aqoon badani. Soomaalidu, waxay ku maahmaahdaa, Hebel, jid mala martay, jabad mala degtay, jidiin mala cuntay.  Haddaba, waxaan leeyahay, Muuse ciyaar iyo caadifad, midna kuma dooran, ee aqoon dheer baan u leeyahay, kow iyo soddonkii sannadood, ee noloshayda u dambeeyey, wuxuu ka mid ahaa raggii garabka iyo gaashaanka ii ahaa, ee igu gedaannaa. Muuse, waxaan la maray jid-dheer, oo waxaan la degay jabad,  oo xitaa ardaagii Geel-jirahana, wada seexannay. Sidoo kale, jidiinna wada cunnay, oo iska daa wax kale’e, jabad cidla ah, labadayada oo qudhi, annaga oo qatan afar caano-maal, hilib Sakaaro ku dubannay.   Sidaa darteed, waxaan ugu baaqayaa dhammaan Taageerayaasha Xisbiga Kulmiye, in ay si buuxda isu bar-bar taagaan, isla markaana u codeeyaan Musharaxa Madaxweynaha iyo Madaxweyne Ku-xigeenka Xisbiga KULMIYE. Waxaan aamin-sanahay, in Mudane, Muuse Biixi Cabdi uu yahay, hoggaamiyaha ugu habboon, ee halkaa ka sii wadi kara hiigsigii aan lahaa, iyo horumarka uu dalku u baahan-yahay mustaqbalka dhaw iyo ka dheer. Gallad Eebee Leh, Guulna Somaliland baa Leh, Guulaysta, Guulaysta, Guulaysta.” Sidaa ayuu Madaxweyne Siilaanyo ku yidhi Khudbadda uu ka jeediyey Burco.

LEAVE A REPLY

Please enter your comment!
Please enter your name here