“Annagu Waannu Ognahay Khasaarihii Iyo Dhibaatadii Na Soo Gaadhay Cidda iska Leh, Laakiin Wali Waanu Dhulsugaynaa”

0
1

Wax-garadka Xaafada Goljano Oo Ka Mahadnaqay Tallaabadii Lagu Baneeyay Laagtii Khasaaraha Gaysatay Ee Shirkadda Seeraar Dusha Ka Xidhay

“Inta Dhiman [Furista Laagta Ilma Seeraar] Haday Garaa’id Tahay Iyo Haday Intaa Lagu Soo Durkay Tahayba, Waxan Leenahay In La Dhamaystiro”

Hargeysa (Hubaal) Dhallinyada iyo Wax-garadka xaafada Goljano ayaa soo dhaweeyay tallaabadii lagu baneeyay lag biyo-mareen ah oo shirkadda dhismaha ee Seeraar dusha ka awday, iyagoona uga mahadceliyey cid kasta oo garab istaagtay sidii laagtaasi loo furi lahaa. Wax-garadka oo shalay shir jaraa’id ku qabtay xaafadaasi ayaa dhanka kalena ka hadlay khasaare kasoo gaadhay laagtaasi la xanibay, waxaanay xukuumadda ugu baaqeen in magdhaw laga siiyo hantidii ka khasaartay oo hore loo qiimeeyay.

“Annagu waanu ognahay Khasaarihii iyo dhibaatadii na soo gaadhay cidda leh, laakiin wali waanu dhulsugaynaa, waxaanu xeerinaynaa jaarnimo oo gogol baa noo taala” sidaasi waxa yidhi Aadan Cabdi Weerar oo ka mid ah wax-garadka xaafada, sidoo kalena ah dadkii khasaaruhu soo gaadhay.

Maxamed Xasan Xaaji oo ka mid ah wax-garadka xaafada, isla markaana ka mid ahaa dadkii guryahoogu daadku galay ee dhibaatadu ka soo gaadhay biyo-mareenka ay shirkadda Seeraar xanibtay, ayaa ka hadlay dhibaatada halkaasi ka dhalatay iyo duunyada iyo dadka ay saamaysay, waxa aanu uu yidhi; “Anigu waxan ahay nin ka mid ah guriga jaarka saddexaad ah, gurigayga waxa iigu yimid biyo gaadhaya mitir iyo badh, hooyaday sariirtii ay ku jiiftay, waxanu kaga qaadnay gacantayada annaga oo toddoba nin ah, maalina maanaan soo istaagin warbaahinta, waayo waxa nagga liita oo nagga xun oo dhibaato taayada ka weyn ay markii afraad soo gaadhay reerkaa Ilma Cabdi Jaamac. Waxanu codsanaynaa in la naggu soo noqdo oo laagtaasi ummadda illaahay ee maanta ku basbeelay ha loo naxariisto.”

Geesta kale waxa ay u mahadnaqeen madaxweynaha iyo dawladda hoose ee fulisay amarkii madaxweynuhu ku faray in la baneeyo laagta, balse waxay sheegeen in loo baahan yahay in la dhamaystiro banaynta laagtaasi oo ay wax u dhiman yihiin

“Marka koowaad Illaahay baanu uga mahadcelinaynaa, marka labaadna madaxweyna ee intuu goobta yimid indhihiisa ku arkay ee isagu yidhi ha la baneeyo, waxaanu ku sii mahadinaynaa dadkii uu faray arrinkaasi ee fuliyey, hase yeeshee waxa aanu jecelnahay, imikana ay dantu noogu sii xidhan tahay inaydaan intaana ka tagin ee inta ka dhiman ee wali xayiraysa ee garaa’idka iyo intaa lagu soo durkayna in la dhamaystiro. Maalintii la baneeyay inta reer ee gama’day ma malaynaysid, laakiin habeenkaas laagtu awdnayd dhibaatadu boqolaal guri ayay gaadhay.”

Shirkadda Seeraar oo ay leeyihiin Ilma Seerar ayaa dusha ka xidhay Laag (Diriinayj) ka mid ah laagaha mara degmada 26-ka June, gaar ahaana xaafada Gol-jano, taasi oo dhibaato badan keentay kadib markii ay cidhiidhiday biyihii halkaasi mari jiray, waxaana markii dambe dhacday in Madaxweynuhu amar uu bixiyey lagu furay laagtaasi la awday

SHARE
Article horeTabobar Loo Soo Xidhay Mudanayaasha Golaha Guurtida Ee Ku Soo Biiray Lixdii Sanno Ee U Dambeeyay
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here