ASALRAAC: Maanso uu Curiyey Abwaan Cabdillaahi ibraahim X. Xassan

0
4

Tixdan kooban ee la magacbaxday ‘Asalraac’ waxa aan u hibeeyay halgamaaga Islaamiga ah ee Aadan Cabdiraxmaan Warsame ‘Aadan-Sunne’ oo ku xidhan jeelka weyn ee Hargeysa, kuna xanuusanaya. Sheekh Aadan waxa aan Eebbe uga rejaynayaa in uu xorriyaddiisa helo, isla markaana il caddaaladeed lagu eego.

“Onkod maansadaydaay
Noqo oogta samahee
Indhawgaradku eegtee
Qof anbaday tilmaantee
Aqoonyahanku beegsado.
Murti wali abbaariyo
Ulajeeddadeed lehe,
Ilayskii xorriyaddiyo
Iftiinkii dulmanihiyo
Abbaanduulkii guushee
Markay adagtay xaajadu
Lagu eeranlaa noqo;
Aflegaaddo kaa dheer.

Waxan uga gol leeyahay,
Ifafaale yaablaa
Indhaw iiga muuqdee,
Arligayga Mawloow
Guri lays inkirayoo
Ruuxii awood lihi
Keligii arrimiyiyo
Agaraadam yaabloo
Aarsigu shaqeeyiyo
Abataqanta ciilkiyo
Asqo iyo ha badin ceeb.

Colka eheluddiinkii
Sheekh Aadan dilayee
Obocdiyo goljilicdiyo
Oofahaysku celiyee,
Ooridiisi xidhayee
Ubadkii cidleeyow,
Ifku waa dharaaroo
Qofna oolli maayee,
Aakhiro Jaxiimiyo
Jahannama uhdeediyo
Abaalkiinnu waa naar.

Caku Aadan-dhiirrane,
Halna waa afeefiyo
Ergo lama huraaniyo
Iidaanka hadalkee,
Aayadaha quraankiyo
Sidii Eebbeheen yidhi
Naftu waa ammaanee
Intii eed ku gaadhee
Goonni kuu ahayd iyo
Eeggiyo maxbuusnimo
Urugiyo kol ay tahay
Uurxumo dhammaanteed
Waxaad kuba illawdaa
Nebi Yuusuf uubtii
Ehelkii ku tuuriyo
Amranow Rasuulkiyo
Anbiyada dhammaanteed
Aadamuhu Sheekhow
Intay dabin u qooleen.

Diintuna islaax iyo
Amni lagu negaadiyo
Waa aragga noloshee
Kuwii oday Shabaabiyo
Argagixiso yaabliyo
Asalraaca kugu qoray
Intii ay alhuumiyo
Ibtilooyin sooheen
Kii illooba noqo baan
Murtidii ku ila xidhay.”

Cabdillaahi Ibraahin X. Xasan –
.

SHARE
Article horeMadaxweynaha Somaliland Oo Si Heer Sare Ah Loogu Soo Dhaweeyay Dalka Imaaaaadka Carabta
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here