“Dawlad Iyo Wax-garad Waxaannu Leenahay Gacan Bir Ah Ha Lagu Qabto Ceel-Afweyn, Ha La Iskugu Tago Oo Ha Lala Dagaalamo Qoloda Diidaysa”

0
1

Haweenweynaha Gobolka Sanaag oo shalay isugu soo baxay baaq nabadeed oo ay cod dheer ugu direen beelaha ku dagaalamaya Ceel-afweyn, Xukuumaddana Ka Dalbaday In Gacan Bir Ah Ay Ku Qabato Degaankaasi

“Haddaad Wax Goconaysaan Oo Aad Leedihiin Hebel Haloo Aaro, Hebelo Kalaad Waayaysaan. Waar Ragga Ha Dhamaynina, Waar Ragga Hambeeya Oo Illaahay Ka Yaaba” Hooyooyinka Ceerigaabo

Ceerigaabo (Hubaal) Bulshada ku dhaqan gobolka Sanaag, gaar ahaan magaalada Ceerigaabo ayaa xukuumadda ugu baaqay inay gacan bir ah ku qabato colaada soo noqnoqnaysa ee degaanka Ceel afweyn.

Haweenka ku dhaqan Ceerigaabo oo shalay sameeyay isku soo bax ay ku taageerayaan sidii wax looga qaban lahaa shaqaaqada gobolkaasi ka taagan iyo sidoo kale xoojinta amniga gobolka, ayaa waxay xukuumadda madaxweyne Muuse Biixi ugu baaqeen in arrintaasi tallaabo adag ay ka qaado. Hooyooyinka ayaa dareenkooda ku muujinayay sida ay uga xun yihiin collaado iyo dhiig la daadiyo, waxaanay dhammaantood ay madaxa ku xidhnaayeen maro cad, halka qaarna ay ruxayeen maradaasi cad oo ka turjumaysay nabadgelyo. Waxaana hadaladoodii ka mid ahaa;

“Dagaalka hala joojiyo, waxay idinla maraysaa inaad caruurihii aad gawracdaan, inaad cirroolihii laysaan, haweenkii laysaan oo is xasuuqdaan. Ninka nabada isku duuba iyo cidkasta oo jecel nabada Ceel afweyn halkan baanu ka taageeraynaa oo waanu garab taaganahay, dadka colaadaasi daminayana waxaan leeyahay guulaysta oo ragga kala celiya. Maalin walba nin baad dilayseen, haddaad wax goconaysaan oo aad leedihiin, hebel haloo aaro, hebelo kalaad waayaysaan. Waar ragga ha dhamaynina, waar ragga hambeeya oo Illaahay ka yaaba. Xukuumadda, labada gole qaran, culimada, waxgaradka iyo nin katsa oo wax garanaaya intaba waxa aanu leenahay, gacan bir ah ha lagu qabto Ceel-afweyn haddanay waano qaadanayn, gacanta haloola yimaado oo halala dagaalamo oo qoloda diidaysa ha la iskugu tago.” Ayay yidhaahdeen haweenweynaha gobolka Sanaag oo shalay baaq ay dirayeen isugu soo baxay magaalada Ceerigaabo

SHARE
Article horeCeel Afweyn: Waa Maxay Gunta Xaajada La Xalin La’yahay?
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here