Hargeysa: Shan Muwaadin Oo Lagu Xukumay Xabsi & Lacag Ka Badan $3 Milyan, Eedaaha Loo Haystay & Xukunkii Maxkamadda Racfaanku Ayiday shalay

0
1

Abwaan Baashe Xasan Maxamed iyo Macallin Cabdiqaaddir Nuur Maxamuud ayay Maxkamaddu Midkiiba Ku Ridday 8 Sanno Oo Xadhig Ah & Ganaax Lacageed Oo Dhan $625,000

“Eedooda Marka La Eego Maxkamada Racfaanka, Markii Shannaad Baa La Badalay, Waana Markii Ugu Horraysay Taariikhda Ee Eed Cusub La Keeno Maxkamad Racfaan, Sharci U Ogolaanayaana Ma Jiro.”

*************************************************************************

Xisbiga Mucaaridka WADDANI oo Xukunkaasi Cambaareeyay

Hargeysa(Hubaal):- Maxkamadda Rafcaanka Gobolka Maroodijeex ayaa maanta (Shalay) midkiiba ku ridday 8 sanno oo xadhig ah iyo ganaax lacageed oo dhan $625,000 (Lix boqol iyo shan iyo labaatan kun oo dollar) laba muwaaddin oo la kala yidhaahdo Abwaan Baashe Xasan Maxamed iyo Macallin Cabdiqaaddir Nuur Maxamuud.

Labadan muwaadin ayaa ku eedaysan dembi ah inay waxyeelo u gaysteen xadhiga Internet-ka ee shirkadda Somcable ku leedahay gobolka Daad-madheedh, iyo weliba magac-dil ay kula kaceen madaxweynaha.

Qareenka u doodayay labadan nin, garyaqaan Jamaal Xuseen Axmed Mandela ayaa sharci-daro ku tilmaamay qaabka uu u dhacay xukunka maxkamaddu. “Laba eedeysanayaal ahaa, oo hore maxkamadda gobolku u sii daysay, oo ay maanta (shalay) Maxkamadda Rafcaanka Gobolka Maroodijeex ku xukuntay ciqaab aad u xulus, oo aanu u aragno inay tahay caddaalad-daro aad u weyn.” Ayuu yidhi Jamaal Xuseen Axmed Mandela oo shalay u waramayay warbaahinta qaar

Labadan muwaaddin oo la xidhay Abril 2018-ka, waxa sii deysay maxkamadda Gobolka Maroodijeex 29kii Oktoobar 2018ka, waxaanay 5 bilood u xidhnaayeen ambiil ay ka qaadatay xeer-ilaalintu, waxaana lagu hayay Xabsiga Dhexe ee Hargeysa.

Maxkamadda Rafcaanka Maroodijeex ayaa 13-kii Feberweri 2019-ka dhegaysatay eedo ay xeer-ilaalintu u jeediyeen labada muwaaddin, oo ka duwan eedihii hore ee maxkamada

“Labadaasi eedaysane ee xukunku ku dhacay, eedooda marka la eego maxkamada racfaanka, markii shannaad baa la badalay, waana markii ugu horraysay taariikhda ee eed cusub la keeno maxkamad racfaan, sharci u ogolaanayaana ma jiro.” Ayuu yidhi garyaqaan Jamaal Xuseen Axmed Mandela

Sidoo kale waxa ay maxkamaddu xoojisay xukun ay Maxkamadda Gobolka Maroodijeex hore u soo saartay oo ahaa 6 sanno iyo lacag dhan $625,000 (Lix boqol iyo shan iyo labaatan kun oo dollar) oo lagu riday Cumar Xuseen Cabdi oo jaray xadhigga SOMCABLE isaga oo ahaa nin reer miyi ah, lagu yidhina “Yuhuud baa leh”. Wuxuu ahaa nin xoogsade ah oo gaadhi-dameer wata.

Waxa hore ciidanka C.I.D uga baxsaday nin Dhakhtar la yidhaahdo oo isna lagu xukumay lix sanno iyo lacag dhan $625,000 (Lix boqol iyo shan iyo labaatan kun oo dollar). Maxkamadda ayaa sidoo kale xadhig dhan 6 sanno iyo $625,000 (Lix boqol iyo shan iyo labaatan kun oo dollar) dul saartay eedaysane maqan oo la yidhaahdo Qalinle.

Xisbiga mucaaridka ah ee Waddani ayaa xukunkaasi cambaareeyay. “Waxaannu u aragnaan labadaas nin ee muwaadiniinta, xisbigana ka tirsanaa, in xukunkoodu yahay caddaalad-darro, waanan cambaaraynaynaa.” Ayuu yidhi xoghayaha Xisbiga mucaaridka ah ee Waddani, Khadar Xuseen Cabdi oo HCTV u waramay

Dadka ehelka u ah labada muwaaddin ee la xukumay iyo sharci-yaqaannada madaxa bannaan ayaan loo diiday inay ka qaybgalaan dhegaysiga xukunkaasi.

Geesta kale, Abwaan Siciid Maxamuud Gahayr oo xogogaal u ahaa eedaymaha loo haystay shantan muwaadin ayaa si faah faahsan u soo bandhigay xukunka maxkamadu racfaanku ayiday, marxaladihii lala soo maray iyo talaabooyinka uu qaaday garsoorihii soo saaray xukunka racfaanka.

Abwaan Siciid Maxamuud Gahayr ayaa warbixin qoraal ah oo uu kaga hadlayo xukunkan ku yidhi sidan:-

“Maxkamadda Rafcaanka Maroodijeex Oo Shan Muwaaddin Ku Xukuntay Lacag Dhan $3,125,000 (saddex Milyan, boqol iyo shan iyo labaatan kun Oo Doollar)

Maxkamadda Rafcaanka Gobolka Maroodijeex ayaa maanta (Shalay) midkiiba ku ridday 8 sanno oo xadhig ah iyo ganaax lacageed oo dhan $625,000 (Lix boqol iyo shan iyo labaatan kun oo dollar) laba muwaaddin oo la kala yidhaahdo Abwaan Baashe Xasan Maxamed iyo Macallin Cabdiqaaddir Nuur Maxamuud.

Labadan muwaaddin oo la xidhay Abril 2018-ka, waxa sii deysay maxkamadda Gobolka Maroodijeex 29kii Oktoobar 2018ka, waxaanay 5 bilood u xidhnaayeen ambiil ay ka qaadatay xeer-ilaalintu, waxaana lagu hayay Xabsiga Dhexe ee Hargeysa.

Maxkamadda Rafcaanka Maroodijeex ayaa 13-kii Feberweri 2019-ka dhegaysatay eedo ay xeer-ilaalintu u jeediyeen labada muwaaddin, waxaana lagu oogay eedo ah:

  1. Inay dhiirri-geliyeen jaritaanka xadhig ay leedahay Shirkadda Intertentka ee SOMCABLE.
  2. Inay abaabulayeen dhallinyaro beesha Garaxajis ah oo ka hor timaadda xukuumadda
  3. Inay ka mid ahaayeen koox Whatsp ah oo la yidhaahdo Haldoorka Garaxajis
  4. Inay raggani lahaayeen xidhiidho taleefan ah
  5. Abwaan Baashe Xasan Maxamed waxa lagu eedeeyay in uu Madaxweynaha Somaliland ku yidhi “Muuse-Shaanni”

Sidoo kale waxa ay maxkamaddu xoojisay xukun ay Maxkamadda Gobolka Maroodijeex hore u soo saartay oo ahaa 6 sanno iyo lacag dhan $625,000 (Lix boqol iyo shan iyo labaatan kun oo dollar) oo lagu riday Cumar Xuseen Cabdi oo jaray xadhigga SOMCABLE isaga oo ahaa nin reer miyi ah, lagu yidhina “Yuhuud baa leh”. Wuxuu ahaa nin xoogsade ah oo gaadhi-dameer wata.

Waxa hore ciidanka C.I.D uga baxsaday nin Dhakhtar la yidhaahdo oo isna lagu xukumay lix sanno iyo lacag dhan $625,000 (Lix boqol iyo shan iyo labaatan kun oo dollar). Maxkamadda ayaa sidoo kale xadhig dhan 6 sanno iyo $625,000 (Lix boqol iyo shan iyo labaatan kun oo dollar) dul saartay eedaysane maqan oo la yidhaahdo Qalinle.

Maxkamadda ayaa cuskatay warqad qiimayn ah oo uu sameeyay Wasiirka Isgaadhsiinta Somaliland Cabdiweli Maxamuud Suufi Jibriil, waxaanay laashay gebi ahaan doodda qareennadii u socday Abwaan Baashe Xasan Maxamed iyo Cabdiqaaddir Nuur Maxamuud. Waxa xus mudan in ay raggani ku noolaayeen Hargeysa oo aanay marna tegin deegaanka Gobolka Daad-madheedh ee fal-dembiyeedku ka dhacay.

Maxkamaddu waxa ay xukunnada qaarkood u cuskatay buugaag ku qoran Afka Carabiga , kuwaas oo laga eegay qiil aan ku jirin eedda loo jeediyay labada muwaaddin ee saaka la xukumay. Guud ahaan lacagta lagu kala xukumay shanta muwaaddin ayaa isku noqonaysa $3,025,000 (saddex Milyan, boqol iyo labaatan kun Oo Doollar), waxaana mid kasta gaarkiisa loogu xukumay lacag dhan $625,000 (Lix boqol iyo shan iyo labaatan kun oo dollar).

Waxa xukunkan soo saaray Garsoore lagu magacaabo Boosniya oo ka tirsan Maxkamadda Rafcaanka Gobolka Maroodijeex, oo diiday in uu dhegaysto cabashada dadka ehelka u ah labada muwaaddin ee la xukumay, sidoo kale waxa uu bannaanka u saaray qaar ka mid ah dhegaysteyaashii xukunka, kuwaas oo uu ku eedeeyay in ay u sare-kici waayeen markii uu soo galay baradii uu xukunka kaga dhawaaqay.

Garsoore Boosniya ayaa sidoo kale diiday in ay dad kale ka qayb galaan dhegaysiga xukunka, waxaanu askarta ku amray in aan la soo deynnin dadka dibadda jooga.

SHARE
Article horeMAXAMED-RASHIID SHEEKH XASAN: Geeriyaay Xejiyaay Fogeeyaay
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here