HUBAAL TV: Gabadh Aabaheed U Saartay Kellideeda Midig Oo Hargeysa Lagu Soo Dhaweeyay

0
30

AKHRI+DAAWO Marwo Asma Sheekh Aadan Xaaji Maxamuud Oo Lagu Soo Dhaweeyay Hargeysa,kana Warbixisay Mid ka mid ah Kellyaheeda oo ay Aabbaheed ugu deeqday

Hargeysa (Hubaal)- Asma Sheekh Aaden Xaaji Maxamuud Xiiray oo dhawaan aabaheed Sheekh Aaden-Siiro ugu tabarucday mid ka mid ah Kalyaheeda si isaga loogu talaalo, ayaa shalay lagu soo dhaweeyey garoonta diyaaradaha ee magaalada Hargeysa.

Asma ayaa kalideeda Midig u saartay Aabaheed Sheekh Aaden Xaaji Maxamuud Xiirey (Aaden Siiro) oo ka mid ah culimada waaweyn ee reer Somaliland, kaasi oo ay la soo deristay dhibaato caafimaad oo sababtay inay fadhiisato mid ka mid ah Kelyihiisu.

Asma-Sheekh-Aaden-Siiro-300x225Sheekh Aaden Siiro iyo Inantiisa Asma ayaa waxa lagu Qalay Cisbitaal ku yaalla Magaalada Hyderabad ee dalka Hindiya, iyagoo labadooduba ka bogsaday qallinkii lagu sameeyay oo si wanaagsan loogu guuleystay.

Garoonka diyaaradaha ee Magaalada Hargeysa ayaa markii ay Asma Sheekh Aaden Siiro ka soo degtay waxa ku soo dhaweeyay dadweyne aad u tiro badan, waxaana markaasi ka dib Asma oo saxaafaddu qolka Nashada ee Madaarka Cigaal ku waydiiyeen dareenkeeda ku wajahan go’aanka ay Aabaheed ugu saartay Kellida, waxa ay ku jawaabtay, “Wax Fiican baan sameeyay, laakiin waajibkayga ayuun baan gutay, waayo xaqa waalidku aad buu u ballaadhan yahay, wax intaa lagu gudi karana maaha,” ayay tidhi, Asma, waxaanay intaas raacisay, “Kelli aan bixiyey xataa xaq Waalid kumaan gudin, ILAAHAY mahaddiina aniga iyo Aabaheyna (Aaden Siiro) waanu caafimaad qabnaa, aad baanan u faraxsanahay,” ayay tidhi Asma.

Asma Sheekh Aaden Siiro oo safarka ay kaga timid dalka Hindiya uu ku wehelinayey Saygeedu, ayaa sidoo kale sheegtay in aanu jirin wax farqi caafimaad ah oo u dhexeeya wakhitgan oo Kelli laga saaray iyo markii hore, waxaanay tidhi, “Wax Farqi ah oo aan dareemayaa ma jirto. Toddoba maalmood baan ku jiray Cisbitaalka, laakiin toddoba maalmood kaddib waxaan ku soo noqday sidii caadiga ahayd, waanan ku faraxsanahay.”

Marwo Asma Sheekh Aaden Xaaji Maxamuud, oo sidoo kale u mahad celisay dadkii ku soo dhaweeyay garoonka diyaaradaha ee Hargeysa, “Dadka i soo dhaweeyay aad bay u mahadsan yihiin, Ehelkayga, Saaxiibada iyo dadka kale ee i soo dhaweeyayba dhammaantood.”

Asma Sheekh Aaden-Siiro oo wax kak bara Jaamacad ku taalla dalka Suudaan, ayaa markii xaaladda Caafimaad ee Aabaheed u baahatay in gacan laga geysto, waxa ay ugu tagtay magaalada Hydrebad ee dalka Hindiya, halkaas oo uu ku yaallo cusbitaalka lagaga saaray Kellida lagu rakibay Aabaheed Sheekh Aaden-Siiro.

Sheekh Aaden Xaaji Maxamuud Xiirey (Aaden Siiro) oo ah waalidka ay Inantiisu u saartay Kellideeda Midig, ayaa isagana caafimaadkiisu aad u wanaagsan yahay oo qalliinkaasi ka bogsaday, waxaana haddii Alle idmo uu dalka dib ugu soo laabanayaa dhawaan, halka Asma ay dib ugu laabaneyso dalka Suudaan ee ay kaga jirto jaamacad.

Asma Sheekh Aaden-Siiro, ayaa noqonaysa, inta laga war-qabo, gabadhii u horeysay geyiga Somaliland ee Kellideeda ku tabarucda si ay ugu bad-baadiso nolosha Aabaheed.

HALKAN KA DAAWO MUUQAALKA

A REPLY TAGO

Please enter your comment!
Please enter your name here