ICG Oo Sheegtay In Dhaqdhaqaaqa Al Shabaab Ee Dalalka Kenya Iyo Uganda Uu Soo Yaraaday

0
1

Nairobi (Hubaal) Shan sano ka hor, bishii Siteembar 2013, afar ka mid ah mintidiinta Al Shabaab ayaa gudaha u galay xarunta laga dukaamaysto ee Westgate ee magaalada Nairobi, iyagoo halkaa ku dilay 67 qof, waxayna xarunta haysteen muddo afar maalmood ah, iyagoo muujinayey in xarakadu ay gaadhi karto meel ka baxsan Soomaaliya. Hay’adda ICG oo warbixin ka soo saartay 5 sano ka dib weerarkaas ayaa ku eegtay khatarta Al Shabaab ee gobolka Afrikada Bari iyo waxyaabaha iska beddelay amniga.

“Ugaadhsiga aan loo aabo yeelin ee ka dambeeyey weerarkaas ayaa sii huriyey carada muslimiinta, wuxuuna sii dardar geliyey in mintidiintu ay dad cusub qortaan” ayaa lagu yidhi warbixinta. Sannadkii 2015 ayey hay’addu sheegtay in maamulayaashu ay nidaamkaas wax ka beddeleen.

Cabdullaahi Cabdille Shaahow oo ka tirsan hay’adda ICG wuxuu BBC u sheegay in dadka deegaanka “laga qayb galiyey amniga, oo ay iyagu hormuud ka yihiin hawlgallada ka dhanka ah Al Shabaab”.

Sida ay hay’adda ICG sheegayso, taasi waxay keentay in istaraatijiyada Al Shabaab ee Kenya ay is beddesho oo ay u wareegaan dhinaca Tanzania, iyagoo gacansaar la samaystay “mintidiin maxalli ah”. “Laakin taasi micnaheedu ma aha in ay dhamaatay khatartii Al Shabaab ee Kenya” ayuu yiri Shaahow.

Sidaasoo ay tahay Al Shabaab waxay weli sii wadeen weerarradii ay ka gaysanayeen Gudaha Kenya.

Warbixintu waxay hoosta ka xarriiqday tallaabooyin ay maamulayaasha Kenya iyo Uganda adeegsadeen oo aan mirodhal noqon, kuwaasoo ay ka mid ahaayeen xadhig aan kala sooc lahayn iyo tacaddiyo ay boolisku u gaysteen dadka muslimiinta ah. Laakin taas casharka laga bartay ayaa ah “in Soomaalida laga qayb galiyey amniga, sidoo kalena dadka dega gobolka xeebta lagu warejiyey sugidda amnigooda” ayuu yidhi C/laahi Shaahow.

Hay’addu waxay ku talinaysaa in talaabooyinkaas la qaaday ay noqdaan kuwo la sii wado, waxayna dhinaca kale soo jeedinaysaa in “la joojiyo dadka la dilo ayadoo aan sharciga la marin”.

Waxay kaloo soo jeedisay in siyaasad ahaan iyo dhaqaale ahaanba la soo dhoweeyo muslimiinta laga tirada badan yahay ee dalalkaas ku nool.

SHARE
Article hore18 Ka Mid Ah Mitidiinta Alshabaab Oo Ku Dhintay Duqaymo Ciidanka Maraykanku Ka Fuliyeen Waqooyiga Kismaayo
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here