“Idaacadii Weynayd Way Fadhidaa, Waxay U Fadhidaana Maaha Qalab Aynu Innagu Samaysanaynay Ee Waa Mid Lagu Sameeyo China”

0
1

Wasiirka Warfaafinta Somaliland Oo Shalay Hortegay Guddida Joogtada Ee Golaha Wakiillada, Warbixina Ka Siiyay Ciladda Idaacada Radio Hargeysa U Fadhido

Muxuu Kaga Jawaabay Su’aal Ahayd in Xubno Shaqaale Ah Loogu Digay Qoraallo Ay Ku Baahiyeen Baraha Bulshada?

Hargeysa(Hubaal)- Guddida Joogtada ah ee Golaha Wakiillada Somaliland ayaa shalay kulan Xog-waran ah la yeeshay Wasiirka Warfaafinta, Dhaqanka iyo Wacyigelinta Somaliland Md. Cabdiraxmaan Cabdilaahi Faarax (Guri-barwaaqo).

Guddoomiye Ku-xigeenka Guddida Joogtada ah ee Golaha Wakiillada Xildhibaan Axmed Ducaale Bulaale, ayaa ka hadlay kulankii ay la yeesheen Wasiirka Warfaafinta iyo Masuuliyiinta kale ee wasaaraddaas, waxaanu yidhi “Waxa aanu la kulanay Masuuliyiinta Wasaaradda Warfaafinta oo uu Hoggaaminayo Wasiirka Warfaafintu, sida dhaqanku yahay annaga yeedhmaddayadu waa yeedhmo shaqo oo sida dastuurkuba dhigayo aanu u yeedhan karno oo aanu ka xog-waraysan karno xilalka ay Qaranka u hayaan.”

“Masuuliyiinta Warfaafinta waxaanu xog-waraysi kala yeellanay  hawlaha ay hayaan, waxyaabaha ay hayaan halkay imika ku sugan yihiin. Warbixin ayey na siiyeen, warbixin faahfaahsan ayey naga siiyeen shaqadooda,”ayuu yidhi Guddoomiye Ku-xigeenka Guddida Joogtada ee Golaha Wakiilladu.

Sidoo kale, Wasiirka Warfaafinta, Dhaqanka iyo Wacyigelinta Somaliland Md. Cabdiraxmaan Cabdilaahi Faarax (Guri-barwaaqo) ayaa  sheegay inay Guddida  Joogtada ee Golaha Wakiilladu Xog-waraysteen isla markaana ay siiyeen warbixin dhammaystiray oo la xidhiidha waajibaadka shaqo ee Wasaaradda Warfaafinta, Dhaqanka iyo Wacyigelinta Somaliland.

Wasiirka Warfaafintu wuxuu sheegay in la dalbaday qalabkii idaacadda weyni u ciladowday,waxaanu yidhi; “Idaacadii weynayd  Warbixinta Guddida aanu siinayna waanu ku darnay way fadhidaa, Waxay la fadhidaa maaha qalab aynu innagu samaysanaynaye waxa lagu sameeyaa dalka Chine, mana aha qalab meel yaalla oo aanu dalbanayno ee marka dalabka la diro ayaa la sameeyaa muddo ayaanay qaadanaysay waanay noo maqan yihiin. Waxaanu filaynaa in dhawaan qalabkaasi noo yimaado oo la kiciyo.”

Wasiirka Warfaafinta oo ka jawaabayey su’aal ahayd in xubno shaqaale ah loogu digay qoraallo ay ku baahiyeen Baraha  bulshada, waxa uu tilmaamay in arrintaasi tahay war been ah oo la tabiyey, waxaanu yidhi; “Waxa jira Guddi anshax Wasaaradda ah oo anshax marisa Shaqaalaha oo 9 qof ka kooban qof kasta oo Weriye ah waa loo yeedhaa iyadoo loo hayo wixii lagaga cabanayey waa la hordhigaa oo waa la weydiiyaa, marka lagu helo  ee go’aan laga gaadho waxa loo gudbiyaa Hay’adda shaqaalaha dawladda, haddii ay Hay’adda shaqaaluhu diiddana waa la soo celiyaa, haddii ay ku qancaanna xukunkii ayaa sidii ku socda. Sidaas darteed sharci darro dalkan ma taallo waxaanu ku shaqeynaynaa Caddaallad.”

SHARE
Article horeMudaharaado Loo Diyaarinayo Kooxda Farmaajo & Maamul Goboleedadiisa Oo 7-da Bishan Ka Dhici Doona London
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here