“Madaxweynenimadu Maaha Rasuul Dadka Inta Raacdaa Ay Janno Ku Helayaan ee Laftoodu Dan Bay Lahaayeen, Md. Madaxweyne Adigu Maxaad Annaga Nala Doonaysay?”

0
1

Siyaasi   KULMIYE ah Oo Is Weydiiyey Sababaha  ay Kaadiriintii Guusha Soo Hooyey Uga Dhex Muuqan waayeen Xukuumadda Uu Madaxweyne Muuse Soo Dhisay

“Madaxweynaha Waxaan Leeyahay Ninka Wasiirka Ahi Waa Inuu Siyaasad Ahaan Reerka Uu Ka Soo Jeedo Kaaga Filnaado Oo Bulshada Uu Ka Dhashay Qiyam Ku Dhex Leeyahay Haddaanu Intaas Kuu Samayn Karina Wax Uu Kuugu Filan Yahay Baaba Iska Yar”

 

Hargeysa (Hubaal)- Siyaasi Axmed Muxumed Cumar (Axmed Nasiye) Oo kamida Masuuliyiinta xisbi xaakimka kulmiye Ayaa Markii uhoraysay siqodheer uga hadlay dhismaha  xukuumada madaxwayne biixi  iyo Sida  ay uga maqan yihiin siyaasiyiintii  hormuudka u ahaa guusha xisbiga kulmiye. Sidoo kale siyaasi Axmed Nasiye ayaa ka warbixiyay safarkii madaxwayne kuxigeenka somaliland ku tagay dalka sucuudiga isaga oo kamid ahaa xubnihii ku weheliyay safarkan,. Sidaasina waxa uu ku sheegay waraysi uu shalay degelka wararka ee Wajaalenews ku siiyey  magaallada Hargeysa

“Madaxweynuhu Markuu meesha (madaxtooyada) tegey ballanqaadyo badan buu u sameeyey asxaabtiisii la soo shaqaysay ee la soo ololaysay, waxyaabaha uu u ballanqaaday waxa kamid ahayd, dawladdii KULMIYE ee isaga ka horreysay waxa ay baalmartay  hawlwadeennadii xisbiga, waxaanay meesha soo gelisay dad aan juhdi badan ku bixin waqtigii ololaha”. Sidaas ayuu yidhi Mr. Axmed, waxana uu intaa kuladhay “Madaxweynuhu wuxuu ka tagay dadkii la soo halgamay oo dad cusub buu qortay,  laakiin isaga ayaa xor u ah cidda uu shaqada qoranayo hase ahaatee annagu xataa arrintaas waanu kala hadalnay markii uu guddoomiyaha iyo murashaxa xisbiga ahaa, waxaanu nagu yidhi kolley illoobi maayo raggaas ila soo dadaalay ee inta ugu badan, waxa laakiin jirta in qofku is weydiiyo dadkan ku dooranayay ee kuu ololaynayay ma adiga ayay iska kaa jeclaayeen, ma dano kale ayay lahaayeen, maxay tahay sababta ay kuu taageerayeen ileyn ninkan siyaasiga ah ee la dooranayaa maaha Rasuul loo soo dhiibay risaallad ama diin samaawi ah oo dadka inta raacdaa ay janno ku helayso laakiin dee qofka taageeraya laftiisu dan [interest] buu leeyahay isaguna ee [siyaasiga uu wato] dembi dhaaf kama rabo”. Ayuu hadalkiisa ku ladhay siyaasi Axmed Nasiye. Waxaa kale oo uu sheegay in  taageerayaashii iyo dadkii ololaha kula jiray madaxweynuhu ay laftoodu dano kala duwan lahaayeen kuwaas oo uu ku dooday in qaarkood mansab ka doonayeen, halka kuwa kalena ay xurmo ka rabeen inay helaan guusha dabadeed “dadkan la socday qofka siyaasiga ahi qaarkood baa dano lahaa, qaar baa xurmo ka rabay, dad kale ayaa iyaguna inay magac ku helaan ka doonayey laakiin waxaas oodhan waxa ka horreeyey……annagu waxaanu leennahay haddaanu nahay taageerayaashii iyo nimankii kula socday, halkaad doonaysay waaanu ku gaadhsiinaye adigu maxaad annaga nala doonaysay?”.

Geesta kale Axmed Muxumed Cumar waxaa uu sharraxay aragtida uu ka qabo dawladda uu soo dhisay madaxweyne Biixi waxana uu yidhi “dawladda uu madaxweynuhu soo dhisay waxay ku sallaysan tahay aragtida qofku aaminsan yahay  iyo sida uu u arko inay sax la tahay  laakiin dadka ayaa ka jawaab celiya, markaas marka ay jawaabta dadku kugu soo noqoto waa inaad falanqaysaa dadkani waxa ay la qaylinayaan ee ay ka hadlayaan.  Toddoba qof haddii ay sabab isku mid ah iisheegaan waa inaan ka go’aan qaataa, hoggaamiya noocaas ahna waxa loo yaqaannaa responsive  leader oo wuxuu ka jwaab celiyaa dareenka dadka” “ta kale anigu markii uu dawladda dhisayay waxaa uu yidhi madaxweynuhu  anigu wasiiirradayda uma diranayo reero  laakiin dhismaha bulshadeena ayaa reero ku sallaysan oo madaxweynahaba reer baa lagu soo doortay, oo reero ayaa loo tegeyey oo na taageera lagu lahaa haddana reeraha laftoodii waan ignore-garaynayaa in la yidhaahdaa ma soconayso”. “ninka wasiirka ahina waa laba arrimood shaqadiisu oo mida koowaad waa in shaqada xafiiskiisa uu ku filnaado, reerkii uu ka dhashay ee uu kas oo jeedayna waa inuu qiyam  ku dhex leeyahay oo siyaasad ahaan kaaga filnaado haddaanu intaas kuu samayn karina wax uu kuugu filan yahay baaba iska yar, markaa waxaan aaminsanahay in dadku waxa ay tabayaan tahay dhaqankaas siyaasiga ah ee meesha ka maqan”

SHARE
Article horeWar Ka Soo Yeedhay Shirguddoonka Golaha Wakiillada Oo Xummad-jebin U Noqday Xaraarad Maalmahan Kacsanayd
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here