Guriga Blog Page 1575

Muuse Biixi Oo Sheegay In Ragii Jabuuti Qarxiyey Hargeysa Joogeen Laamaha Amaankana Dhaliilo U Soo Jeediyey

0

Waran Cade ayaa ku faanay waxaan ahay ragii toogtay markuu siilaanyo mucaaridka ahaa hadana uu iga maarmi waayey oo wasiir ayuu iga dhigtay. Tana ku darso ragbaa madaxtinimo Shaani ku doonaya”

yaab

Hargeysa (Hubaal)- Gudoomiyaha xisbiga KULMIYE Muuse Biixi Cabdi oo maanta ka hadlaayey kulamo ay la yeesheen golaha guuritda Somaliland ayaa sheegay inay ka wada hadleen arrimo badan oo khuseeya garab kastaaba wuxuu tabanaayo, taas oo ay guurtidu dhagaysteen.

Muuse Biixi Cabdi ayaa sheegay in markii gudoomiye ahaan uu sheegay inuu sharaxan yahay uu madaxweyne Siilaanyo qaaday dagaal cirka iyo dhulka ah, waxaanu yidhi mar uu arrimahaas ka hadlaayey “Guurtida waxaan ka wada hadalnay sidii ay noogu muuqatay waxa dhibaada keenay oo aanan imika halkan ka wada akhari karayn oo ay kow ka tahay shirweynihii xisbiga wixii uu go’aamo gaadhay oo lagu daray waxaan jirin, dhibta koowaad halkaas ayey ka kacday. Dhibtaas waxaa ku xigay markii aan

anigu idhi waxaan ahay murashax, dagaal cirka iyo dhulka ah ayaa la qaaday oo uu madaxweynuhu qaaday”

Sidoo kale wuxuu sheegay Muuse Biixi inay guurtida ka wada hadleen dadka loo xidh xidhay taageerida garabka uu hogaaminaayo Muuse Biixi, waxaanu intaas ku daray oo uu cambaareeyey ku adkeeyey xadhiga loo gaystay wasiir ku xigeenkii hore ee amniga Cabdilaahi Abokor, waxaanu yidhi

“Wasiir ku xigeenkii hore ee amniga Cabdilaahi Abokor xadhiga la xidhay waa xadhig siyaasiya, waxaan ognahay xadhiga siyaasiga ahi colaad iyo nac iyo xumaan mooyee wanaag ma keeno, waxaa iyana dhibaato labaad ah qaabkii loo qabtay ee gurigiisa loo galay, qof wal oo daawaday dhaawac iyo fool xumo way ugu filan tahay, cidii talaabadaas qaaday waxaan qabaa inay u badheedhay qaladkaas”

Gudoomiyaha xisbiga KULMIYE ayaa ka hadlay dad uu sheegay in loo xidh xidhay taageerida cisbiga KULMIYE, waxaanu yidhi

“waxaa la xidhay dad taageerayaasha xisbiga ah oo loo xidhay sawirka gudoomiyaha ayey siteen, madaxweynaha waxaan waydiinayaa markuu sawirka gudoomiyuhu noqday dambi kaaguna noqday xalaal”

Sidoo kale Muuse Biixi waxa uu sheegay inay xukumada ka diidan yihiin qaraxyo uu sheegay in lagu eedeeyey dad madaxtinimo doonaya, waxaanu sheegay inuu aad uga xun yahay inay afka madaxweynaha ka soo baxdo arrintaasi, waxaanu intaas ku daray in aanu wasiir Waran Cade la yaabay eryada deel qaafka ah ee ka soo baxay, waxaanu yidhi

“Wuxuu yidhi (Waran Cade) isaga oo Space Channel-ka la hadlaaya anigu waxaan ahaa oo uu ku faanay ragii toogtay markuu Siilaanyo mucaaridka ahaa hadana uu iga maarmi waayey oo wasiir ayuu iga dhigtay. Tana ku darso ragbaa madaxtinimo Shaani ku doonaya”

Ugu dambayntii gudoomiyaha KULMIYE Muuse Biixi Cabdi ayaa dhaliilo u soo jeediyey wasiirka arrimaha gudaha ee Somaliland, isagoo sheegay in ragii dalak Jabuuti ee Somaliland la jaarka ah qarax ka fuliyey Hargeysa joogeen mudo bil ku dhaw, waxaanu yidhi

“waxaan waydiinayaa wasaaraddaha amniga oo uu kow ka yahay wasiirka daakhiligu ragii Jabuuti qarxiyey waxaa la sheegay inay dhawr iyo labaatan cisho hargeysa joogeen, dhaawac iyo ceeb ka wayn oo Somalialnd dul saarani ma jirto”

Wasiirka Macdanta Oo Sifo Shaqsi Ah U Qabsaday Qareeno Ka Difaaca Shirkadda EARG Oo Ku Eedaysay Inuu Ka Dhacay Block 19

0

Hargeysa, (Hubaal) –  Waxa soo shaac-baxaya xogo cusub oo ku saabsan dacwad ay fooda iskula jiraan Wasiirka macdanta iyo tamarta Somaliland Xuseen Cabdi Ducaale (Waji-xun) iyo shirkadda EARG  (East African Resource Group) iyadoo uu wasiirku sifo shaqsi ah qareen ahaan u qabsaday Baker Botts oo ah xafiis ay leeyihiin garyaqaano Maraykan ah oo caan ahi.

Haatuf.n

Shirkadda EARG oo la odhan jiray Asante Oil heshiis shidaal baadhis ahna la gashay dawladda Somaliland sanadkii 2008-dii ayaa ilaa dabayaqaadii 2013-kii ku dacwoonaysay in Wasiirka macdantu si sharci daro ah u bixiyey Block 19 oo ah dhul ay iyadu Leysan u haysatay, isla markaana uu wasiirku dhulkaasi oo ku yaala gobolka Sool ku wareejiyey shirkadda Ansan taas oo uu leeyahay ganacsadaha Yemeniga ah ee Shaahir Cabdul-Xaq.

Hadaba mulkiilayaasha iyo qareenadda shirkadda EARG ayaa bishii May ee ina dhaaftay waxay xukuumadda Somaliland soo kala waydiiyeen in iyadu magaceeda ku soo wakiilatay qareenada Baker Botts iyo in wasiirku shaqsi ahaan u soo wakiishay Baker Botts. Hase yeeshee xukuumadda Somaliland ayaan ilaa hadda kala cadayn cida qabsatay looyaradaasi Maraykanka ah.

Laakiin baadhitaan uu Wargeyska Haatuf  ku sameeyey arrintan ayaa waxa uu ku ogaaday in Wasiir Xuseen Cabdi Ducaale A.K.A Hussein Osman Farah uu qareenadda Baker Botts shaqsi ahaan u qabsaday, iyadoo uu takaaliifta faraha badan ee ku baxaysana uu ka qaabilay Shaahir Cabdul-Xaq taas oo xukuumadda Somaliland ku noqon karta fadeexad caalami ah in Wasiir ka mid ahi uu si shaqsi ah u maamusho uguna tagri-falo hanti qaran oo uu masuul ka yahay oo waliba madaxwaynihiii dalkuna sidaas kula socdo kuna ogol yahay.

Wararka dacwadan ay shirkadda EARG oo dhinac ah iyo shirkadda Ansan iyo wasiirka macdanta oo dhinaca kale ahi ku murmayaan lahaanshaha Block 19 ee ay qareenada caalamiga ah isku qabsadeen ayaa waxa uu wasiir Xuseen ku tilmaamaa qaar aan sal iyo raad toona lahayn iyadoo eedaha 11-ka ah ee ay dawladda Somaliland ku oogtahay Wargeyska Haatuf ay ka mid yihiin qaar ay ka qortay is-haysigan ka taagan Block 19  iyo ceebta ka soo socota ee saamaynta ku yeelan doonta sumcadda dibadeed ee dalka Jamhuuriyada Somaliland.

Wasiirka macdantu shirjaraa’id oo uu magaaladda Hargeysa ku qabtay 20/12/2013 wuxuu ku soo bandhigay Jeeg $1,800,000 (Milyan iyo sideed boqol oo kun oo doolar) kaas oo uu ku sheegay lacag xaqul-qalin ahaan uu uga qaaday shirkadda Ansan oo uu heshiis kula galay inay shidaal ka baadho dhulka Block 19, 14 iyo qayb ka mid ah Block 7 oo dhamaantood ku yaala barriga Somaliland (Wasiirka ayaa 10/5/2014 dhagaysigii maxkamadda ee dacwadda ay dawladu ku soo oogtay Haatuf ku dooday inuu $1,700,000 xaqal-qalin ahaan uga qaaday shirkadda Ansan).

Shirkadda EARG oo ku dacwootay inay iyadu ruqsad u haysato Block 19 sida uu dhigayo heshiiskii ay la gashay dawladda Somaliland 6/2/2008 ayaa waxa uu wasirku qoraal ku taariikhaysan 23/12/213 (laba cisho ka dib markii uu Block 19 ku wareejiyey Shaahir Cabdul-xaq) ku ogaysiinayaa EARG inay lumisay xuquuqdii ay ku  lahayd  Block 19 taas oo ay shirkadda EARG kaga soo jawaabayso qoraal dheer oo ku taariikhaysan 19/1/2014 oo ay ku garnaqsanayso sida ay iyadu u leedahay Block 19.

Qoraalkan oo ay Wasiirka u soo direen qareenada EARG oo la yidhaahdo CLYDE & Co  ayaa waxay dhinac iskaga leexinayaan dhaliil uu Wasiirku u soo jeediyey in shirkad ahaan aanay lahayn awood dhaqaale iyo mid farsamo oo ay ku hawlgasho toona, waxaanay qareenadda shirkadu hoosta ka xariiqayaan in Wasiirku aanu marnaba arrintaas oo kale ku dhaliilin shirkadda EARG ka hor intii aanu Block 19 ku wareejin maalqabeenka Yemeniga ah.

Sida la ogsoon yahay Diyaarad JET ah oo uu leeyahay Shaahir Cabdul-Xaq ayaa waxa mar qaaday  Madaxwayne Siilaanyo oo booqanayey dalka Turkiga.

Bulshadda Somaliland ayaan iyagu fursad u helin inay wax ka ogaadaan heshiisyada dhinaca shidaal baadhista ee ay dawladda Somaliland la gasho shirkadaha ajanabiga ah, maadaama oo aan heshiisyadaasi la marinin Baarlamaanka isla markaana warbaahinta Somaliland-na aanay inta badan xogogaal u ahayn arrimahaasi inkasta  oo ay xukuumadda Siilaanyo dhawaan albaabada u laabtay Wargeys-yada Haatuf iyo Somaliland Times oo iyagu 10-kii sanadood ee u danbeeyey aad iskugu taxaluujin jiray inay Shacbiga usoo bandhigaan xogaha laga qariyo ee ku taxaluqa heshiisyada  shidaal badhista.

Haatuf.net

Tacaboow ba’ caawaba hadduu Timir i Caayaayo

0

faysal cumar madar

faysal Qumuj

Rabow saawa saawaha naga samato saar. Sida culimadu sheegeen maalinta jimcaha waxa ku jira “saacatu ijaabe”. Waxa aan uga xumahay habeenkii jimce ee 30/may/2014 wixii ka dhacay Hargeisa gurigii maatidu u taalay wasiirkii hore ee amniga Mudane Cabdilaahi Abokor ,cidna u sheegimayo siday wax u dhaceen lakiin waxaan wax ka leeyahay aragtidayda ku wajahan weerarka aanan hore u arag, wasiir Cabdilaahi abokor wuxuu ka hadlay qolo uu kusheegay  gunti gaab oo ah wadadan danbe ee aan lamahadin ee la yidhi qofka ay wax siiyan waxay ku qoraan buuga ay ku qoraan sakada maalkooda ku waajibta. Wuxu yidhi niman magacyada iska badbadala oo marba la baxa magic sida: (ixsaan,ictisaam,ikhwaan,damujadiid,nahda iyo al-shabaa), wuxuu sheegay in shirarka golaha wasiirada aan lagaga wada hadlijirin arimaha khuseeya Al-shabaab iyo qaar wasiirada ka mida ay arimaha ku lugleeyihiin , anagoo yaaban oo isle waar waa sidee oo aan aaminay in uu wasiirku cadhadii xilka qaadista ayaa ka keentay, waxan filayay laba arin miduun: waa ta koowaade in loo jawaabo oo wasiiradu is cadeeyaan iyo in aan lagaba ficil qaadan oo lagasoo qaado arinkiisa wax aan waxba ka jirin. Midna ma dhicin ee waxa loogu jawaabay in ciidamo lagu soo saaro gurigii uu daganaa iyadoon xataa laxeerin guryihii jaarkiisii ahaa, oo aad moodayso in laweerarayo bir-jeex , waxa bandoo laga dhigay magaalada Hargeisa siday u dhantahay, waxa kale oo ciidamo laduldhigay gobolada dalka midka mida iyo waliba malaha xaafado loo tuhmayay in looga soo gurmado wasiirka , waxa intaaba kasii darnaa in guriga uu daganaa dusha laga soo tooganayay sidii diyaradiihii faqashta ee Hargeisa intay ka kacaan isla Hargeisa duqaynayeen. Yaab waxaban aaminay in ay ahayd shirqool  la is lahaa ku khaarajiya oo ay soo maleegeen gunti-gaabtii u fashiliyay. Lakiin waxaan ogahay in uu dadka ilahay dilo. Waxa kale oo aan ogahay in dalkan difaaciisa ugu weyn ayahayaan culimo sharaf badan oo qaadiriyadii dalkan xoraysay ah oo la dagalantay wixii fall iyo sixir siyaad nagula dulgoobayay.

Waxaan ka xumay madaxweyne inaad adigu afkaaga ka dhalisho kuwaad amaanka u dhiibatay ee dalka sidii lakala goynayo ciidamo kala dhexdhigaya , waxa laga yaabaa in sidii caadad inoo ahayd in khilaafka kulmiye dhamaado iyadoo dalku dhisan yahay waayo waxa la’ogaa sidii iyo Beel Beel lookala baxay in la dhamaystay manta madaxweyne adoo ogaa dagaaladii Habar-Habarta tariikhdaad ku lahayd in maantana aad istidhaa ku daawo, ogow lakiin manta adaa dalka ka taliya oo Cigaal iyo Cabdiraxman Tuurba way dhinteen.

 

 

Mudane madaxweyne cidan aad u haysato in aad is-haysaan waa xisbigaagii  KULMIYE, ee maaha UDUB. Madaxweyne maxad dareemaysaa marka xisbi xaakimkaagi aad aasaasaha ka ahayd xalinkari waydo in aad qarankan sii Hogaamin karto? Jawaabtu waa maya madaxweyne xoolaha oo kaliya ayaa lagu maallaa  Maqaarka ee maaha dadka kuwa lagu dhaqaa sidaa. Madaxweyne caasimadii dalkan aad haysato jooga ayaad madaxweyne cajalad usoo diraysaa dadkaagii sidii Al-shabaab,  miyaanay wixii wasiirkii Amniga lagu weeraray sii Xoojinayn.

Waxa kale oo wax lala yaabo ah in ay dadku yidhaahdaan madaxtooyadii way ka baxday go’aankii guurtida la qaateen ee shicibku maraga ka ahaa oo aadku doodaan ergadii soo lugo’aday ayaanu qado u samaynay , taa macnaheedo miyaanay ahayn waa dhoolatus ama kaambayn aad ku xodxodanayso golihii dhexe ee hadalku ka dhashay . waa ceeb halkii dalka u saraysay in loo nisbeeyo in ayka baxdo balankii ay qaadeen ee ahaa in labada qoloba joojiyaan shirarkii ay ku baaqeen. Madaxweyne adoo ergo diida makula tahay in aad dalkan sii hogaamin doonto, taasi waa wax aan dhacayn, nagu dhaqi maysid Ergo diidnimo dhabarku muuqdo.

Mudane madaxweyne hogaankan xisbigu waa kuwaad dheerayd labadii xisbi  ee aad lasoo tartantay 2010kii haday xumayeen iyo haday samaayeenba horta waa ragii ku waday ee dadka kusoo qasbay iyadoonad iibsanteen la’aantood. Maaha rag loonisbeeyo SHAANI ee waa rag taariikhda iskuulada caruurta loogu dhigo ku jiraan guulaha hoodia iyo taariikhdooduba, kadaa ma gayaan  SHAANIDA ee waxa gaya waa layaqaanaa. Madaxeyne hadaad mar iyo afarba u yeedho kuwa xilalka kuu haya oo aad tidhaa dadkiinii keena, kuma keeni karaan dadkii waxay lajoogaan Hogaankan ay kugu cabsiinayaan wasiiradaadu wax codana kuuma hayaan. Dadku waykaa tashadeen ee mudane madaxweyne taariikhdaad u tasho.  Hadaad lakiin caydo kuwii maalintii adkayd kaasoo saaray dadku waxay kuu aqoonsan doonan Timirkii Cali Jaamac Haabiil sheegayay ee markuu sii daayay soo caayay:

 

Tacaboow ba’ caawaba hadduu Timir i Caayaayo
Tol la’aan dheh reer Samatarkaan tiirka qabadsiiyey
Waxsaan kaaga tegey Faadumaad tahay ninkeediiye

Badhasaabka Gobolka Saaxil Oo Saaka Xabsiga Dhigay Wariye Maxed C/laahi (Soofadhiste)

0

Maxed c/laahi Faarax (Soofadhiiste ) oo ka mid ahaa wariyaasha madax banana ee ka hawl gala gobolka saaxil Gaar ahaa  TG Somali challe  iyo wargeyska Saxafi  ayaa saaka isagoo shaqadiisa maalin ahaa ku gudo jira ciidanka police ugu yimaaden xarunta dawlada hoose berbera oo ka socotay munaasibad ay dalada heer qaran sonyo qalab sport  ugu wareejinayeen wasaarada dhalin yarada ciyaaraha “

DSC08856

Halakaas ayaa ciidan uu hogaaminyo taliye xigeenka police gobolka saaxil uga yeedhen wariye soofadhiiste oo ay u sheegen in uu xidhan yahay oo saldhiga dhexe la rabo

Wariye soofadhiiste ayaa intii aanu fuulin gaadhiga lagu qaadi ahaa cod kooban oo warbaahinta siiyay ku sheegay inuu amarka xadhigiisu ka yimi guddomiyaha gobolka saaxil Fahmi cabdi Bidaar .waar waad maqlaysaan oo xadhigayga waxa  ka danbeeya  Badhasaabka gobolka saaxil  fahmi cabdi bidaaar sidaa saxiibayaal kula socda oo qalabka ii qaada “

Badhasaabka gobolka saaxil oo aan isku dayay inaan wax ka waydiino xadhiga  wariyaha iyo ujeeda ka danbaysa ayaa noo suuro galin xafiisa oo aanu ka wayn awgeed iyo telephone gacan noo dhici  waayay

HUBAAL KA AKHRISO: Lamaanne Cishqigoodu Ka Bilaabmay Ololihii KULMIYE Oo U Dabran Dhaqaallihii Ay Ku Aqalgeli Lahaayeen

0

Waxaan Ka mid ahaa dhalin yaradii Xusbiga kulmiye ku biirtay markii la asaasay, ee ka qayb qaadanayay olalahii xisbiga ee Dhalinyarada lagu wacyi galinayay kamid noqoshada xisbiga. ololahii u danbeeyay ee xisbiga kulmiye kula tar tamayay asxaabta kale kursiga madaxtooyada ayaa aniga iyo koox kale oo dhalinyaro isugu jiray Wiila iyo gabdho, waxaanu u baxnay deegaano kamida dhulkii sida wayn looga taageeray, gaar ahaan gobolka togdheer si’aanu ugasoo fulino ololahii la xidhiidhayay wacyi galinta bulshada, hasa yesshee kooxdan aanu wada soconay ayaa waaxay isugu jirtay dhalinyaro dhawaan xisbiga ku soo biirtay iyo kuwo hore ugu sii jirayba, nasiib wanaag waxaanu kusoo guulaysanay hawshii aanu u baxnay ee ahayd wacyi galinta ololahii xisbiga kulmiye balse intii aanu kujiray hawshiii wacyi galinta oo ahayd mudooyin kala duwan, ayaa aniga iyo inan kamida hablahii aanu wacyi gelita ku wada jiray ayaa waxaa qudhayadii naga dhex bilaabmatay olole jacayl oo midkaayaba sigaara u saaqay.
Haseyeeshee, waxaanu dhex dabaalano badwaynta jacaylkaba, waxaanu ku balanay in marka uu guulaysto xisbiga kulmiye Axmed Siillaanyo ee uu ku fadhiisto kursiga hogaaminta dalka, inaguna aynu yagleeli doono aqalgal keenii iyo arooskeenii inta ka horeysa na uu inoo dabranaado oo aynu ka shaqayno danaha xisbiga.
Waxa doorashadii ku guulaystay xisbigii kulmiye ee Axmed siilaanyo, waxa uu noqday madaxwayne waxaana rumowday himiladayadii kowaad waxanu bilawnay sidaanu ugu diyaar garoobi lahayn sidii aanu u dhamaystiri lahayn balantii aanu galnay oo ah diyaarinta aroos kayagii iyo guri aanu kuwada noolaano.
LAMAANNE CISHQIGOODU KA BILAABMAY OLOLIHII KULMIYE OO U DABRAN DHAQAALLIHII AY KU AQALGALI LAHAAYEENNasiib darrose waxaa geeriyooday aabahay, taasina waxay dib u riixday qorshahii arooskayaga. dhibta aduunyo way badan tahaye, waxaad doonaysaana kuuma wada dhamaadaan, waxaanagu adkaaday waayahii aduunyo waxaananu waynay dhaqaale aanu ku aqalgalno, waxaana sii kordhay jacayl kaygii na dhexyaaley ee ka bilaab may ololahii xisbiga kulmiye ilaa hada waxaanu u dabranahay dhaqaalahii sidaas awgeed madax waynaha qaranka Axmed Maxamed siilaanyo iyo marwadiisaba iyo dhamaan madaxda iyo hogaanka kulmiye waxaanu ka codsanaynaa inay gacanka gaystaan aqal gelinta jacaylka yagan iyo aroosida lamaanahan jacayl koodu ka bilaabmay ololahii kulmiye sidoo kale waxaanu ganacsatada iyo shirkadaha waawayn ka codsanaya inay gacan dhaqaale oo aanu ku aqal galno nagu caawiyaaan.
Maxamed Maxamuud Nuur.
Burco, Somaliland
Account Number:11705
Tel: 0634324850
E-mail: maxamedyare850@hotmail.com

Raalli Ahaw Dalkaygow!!!!!. W/Q: Cabdisalaam Yaasiin

0

Ilaaha baa mahad oo dhan iska leh. Ilaaha aduunka qaybsha ee dalkan Somaliland qayb noo siiyay ayaa mahad iska leh. Mahad Alle ka dib, waxa nagu waajibay Somaliland-neey in aannu kuu mahadnaqno.
Kuu maanaan mahad naqin, ee raali naga ahaw!, Waxa nagu waajibay sidii aad noo daryeeshay in aan kuu daryeelo.
Kuu maanaan daryeelin, eeraali naga ahaw.Waxa nagu waajibay in aannu dad ahaan dunida ka dhex muuqano; oo aragaaga iyo astaan taadu meel marto.
Dunida kama muuqano; aragaaga iyo astaan taadunu ma meel marin; ee raali naga ahaw.Waxa nagu waajibay in aanu dushaada dawlad caadil ah oo casri ah ka dhisino.
Dawlad caadil ah oo casri ah ka maanaan dhisin dusaada, ee raali naga ahaw. Markii aad gilgilatay ee aad gunimo diiday, waxa nagu waajibay in aanu dadkii goba nimadaad u naf baxay ama u naafoobay xurmayno. Maanu xurmayn oo maanu xanaanay, ee raali naga ahaw. Waxa nagu waajibay in aannu dhisno maamul daacad ah oo danwaadago ah oo dulmiga tira, danyarta ilaalsha, dadweynahana dhegaysta oo siyaasiga daydayga ah deedifeeya. Maanaan dhisin ee raali naga ahaw.
Cadbisalaan-YasinDiir baannu noqonayoo,
Deegaankeenii ayaanu xaalufinay.
Dayday baanu noqonay.
Danyartii ayaanu baadhanay.
Dawladnimadii, nin dibray,
nin debbed ka yimi iyo
nin dayday ah ayaa afduubay.
Dibjirkii, derbijiifkii, danyartii,
da’ yartii, iyo dadweynihii
darxumo iyo daranyaa heshay.
Da’ yarti waa dideen,
waa dooleen, waa doogsin carareen.
Lama Degaan, doon-badeed, iyo dugaag baa laayay.
Haddana: Dushoodaannu isku haysanaa; dushaadaannu isku haysnaa. Waxa lagu dan seegay, waxa lagu dad seegay, waxa lagu dal seegayna:
“Dayaxu waa kabash kabash leeyahay iyo madaa kabo u tolaya?” Eee raali naga ahaw, dalkayagow!!!

HUBAAL TV: DAAWO Madaxweyne Siilaanyo oo Meel Isugu Keenay Garabka KULMIYE ee uu Hoggaamiyo+Qado-sharaf Lagu Xaadiriyey Magacyadii Golaha Dhexe

0

Garabka KULMIYE ee uu Madaxweyne Siilaanyo hoggaamiyo oo sheegay in Shirkooda Golaha dhexe oo ay qabashadiisa maanta u qorsheeyeen inay dib u dhigeen

Hargeysa(Hubaal):- Madaxweynaha Somaliland Axmed Maxamed Maxamuud (Siilaanyo), ayaa maanta kulan qado ah Huteel Ambassador ee magaalada Hargeysa ugu sameeyey Garabka Xisbiga KULMIYE ee uu hoggaamiyo ee Guddiga Fulinta iyo Xubnaha Golaha dhexe ee shaacintooda khilaafka Xisbiga kala qaybiyey ka dhashay.
Kulankaas qadada ahaa oo uu Madaxweynaha Siilaanyo u sameeyey Xubnaha Golaha dhexe iyo Guddiga fulinta ee Garabka Hoggaanka KULMIYE ku gacan-saydhay sharcinnimadooda, isla markaana ay beddelkooda soo saareen laba Liis oo Guddi Fulineed iyo Gole dhexe oo KULMIYE leeyahay ah, ayaa maanta isugu yimi Huteel Ambassador, waxaana kaasoo qaybgalay 267 xubnood oo ka tisan Golahaas dhexe.
Ciidagale Gole DhexeInkasta oo aanu Madaxweyne Siilaanyo kulankaas goob-joog ka ahayn, haddana Masuuliyiintii halkaas ka hadlay ayaa sheegay in Madaxweynuhu Xubnaha Golaha dhexe iyo Guddiga fulinta ee isaga kala yimi gobollada iyo degmooyinka dalka iyo weliba waddamada dibedda qaarkoood.
Hase-yeesshee, waxa kulankaas lagu shaaciyey in Garabka Madaxweyne Siilaanyo hoggaamiyo ee Xisbiga KULMIYE aqbalay dhex-dhexaadinta Ergada Golaha Guurtidu sheegeen inay ka dhex-bilaabi doonaan labada dhinac ee KULMIYE u qaybsamay oo ay kala hoggaaminayaan Madaxweyne Siilaanyo iyo Guddoomiyaha Xisbigaas Muuse Biixi Cabdi.
Madaxweyne ku-xigeenka Somaliland Cabdiraxmaan Cabdillaahi Ismaaciil (Saylici) oo ka hadlay kulankaas Qadada ahaa ee maanta, ayaa sheegay in ujeeddada ay isugu yimaaddeen tahay Casuumad Madaxweynaha Somaliland Axmed Maxamed Maxamuud (Siilaanyo) u fidiyey xubnaha Golaha dhexe, Guddida Fulinta iyo Hoggaanka sida uu hadalka u dhigay, kuwaasoo Caasimadda u yimi inay ka qayb-qaataan shirka Golaha dhexe ee Xisbiga, oo uu sheegay in Madaxweynuhu ka aqbalay Golaha Guurtidda xallinta khilaafka ka dhex jia KULMIYE awgii loo hakiyey Shirka Golaha dhexe ee Garabkooda oo maanta qabsoomi lahaa.
Waxa uu Madaxweyne Ku-xigeenku intaas ku daray in Xubnihii Golaha Dhexe oo dhan 257 ku sugan yihiin Qado sharafta, labaataneeyo ka mid ahina hawlo shaqo ugu maqan yihiin dalka dibeddiisa. Md. Saylici, waxa uu sheegay in Xisbiga KULMIYE madashaa ku dhan yahay, hase ahaatee uu baaq u jeedinayo Guddoomiyaha iyo Guddoomiye Ku-xigeenka koowaad ee KULMIYE Muuse Biixi Cabdi iyo Maxamed Kaahin Axmed oo uu ka dalbaday inay hoggaaminta Xisbiga dib ugu soo laabtaan.
Xoghayaha guud ee Xisbiga KULMIYE Xasan Siciid Yuusuf oo isaguna halkaas ka hadlay, ayaa sheegay in uu u mahad-celinayo Ergada Shirka ee Golaha dhexe oo uu sheegay in qorshuhu ahaa inay maanta isla madashaas ku qabsadaan Shirka koowaad ee Golaha dhexe ee KULMIYE (Garabka Madaxweynaha), balse uu u baaqday aqbalaad uu Madaxweynuhu aqbalay Baaqa Guurtida ee dhex-dhexaadinta Khilaafka dhinacyada KULMIYE, balse aanay fogaannin ee ay dhawraan go’aanka kan xiga maalmaha soo socda.

IMG_9964

Fanaannada Nimco-deggan Oo Bandhig Faneed Ay Ugu Magac Dartay “Rabitaanka Shacabka” U Qabanaysa reer Hargeysa

0

Fanaanadda Nimca Degan Oo 5-Bishan Wacdaro Ka Dhigi Doonta Hotel CROWN Ee Magaaladda Hargeysa Iyo Showga Loogu Magacdaray RABITAANKA SHACABKA.

5555871

Hargeysa(Hubaal)Fanaanada Codka Iyo Muqaalkaba Guule Hibo Usiiyay Ee Nimco Degan ayaa Show 5-Bishan Juun kugu Qaban Doonta HOTEL CROWN Ee Magaalada Hargeysa.

Fanaanada Nimco Degan ayaa Dalka Soo Gaadhay Kahor Xuskii Maalinta Qaran ee 18-May si ay shacbigeeda Ula Qaadato Farxada Maalintaasi.

Balse Bulshada ayaa codsatay In fanaanadu ay show-yo Gaar ah kula Caweyso Shacbigeeda waxanay Nimco Goostay Inay Taariikhda Kor Ku xusan Shacbigeeda Kula Caweyso Showga Ay ugu Magacdartay RABITAANKA SHACABKA Ee Ka dhici Doona HOTEL CROWN Ee Magaalada HAREGYSA

Nimco ayaa waxa Sidoo kale Showgaasi Ku wehelin Doona Fanaaninta Kale Ee Sahra Ilays Iyo Maxamed Siciid BK.

GOOBTA:-Crown Hotel Hargeysa.

QIIMAHA :- $ 20

FANAANIINTA:- Nimco Degan, Sahra Ilays, Maxamed BK

HUBAAL Ka Akhri: Xukuumadda Oo Xiisadda Siyaasaddeed Ee Xilligan Oogan Darteed Ammaankii RADIO Hargeysa Iyo SLNTV U Dalbatay Ciidammada Qalabka Sida

0

Hargeysa (Hubaal) Xukuumadda ayaa Ammaanka Wasaaradda Warfaafinta aad u adkaysay. Ciidamada Qalabka sida oo ku gaashaaman Hubka noociyadiisa kala duwan iyo gaadiidka Dagaalka ayaa la sheegay in ay la wareegeen amaanka iyo ilaalada Wasaaradaasi.

Shaqaalaha  iyo dadka caadiga ah ee Wasaaradaasi hawluhu ay ka galeen ayaa aad loo baadhayaa, halka Studiyeyaasha Idaacada iyo Telefishanka Qarankana ay hor taagan yihiin ciidamo hubaysani.

Lama garanayo sababta ay Xukuumaddu ay ciidamada Qalabka Sida ugu soo daadisay Wasaaradda Warfaafinta, hasayeeshee wararka soo baxaya ayaa sheegay in khilaafka Kulmiye oo aad u cakirani ay sabab u tahay in amaanka Wasaaradda Warfaafinta aad loo adkeeyo.

Dhinaca Kale Idaacada Radio Hargeysa ayaa bilawday Barnaamijyo su’aalo lagu waydiinayo Wariyeyaasha Gobolada iyo Degmooyinka sida ay dadku u arkaan murashaxnimada Madaxweynaha  Somaliland iyo Khudbad lagaga soo duubay Madaxweynaha shalay qasriga Madaxtooyada.

Hogaanka xisbiga Kulmiye ee aan madaxweynaha kula aragtida ahayn sida uu ilaa iminka u socdo xisbiga kulmiye ayaan wararkooda laga sii daynin Idaacada iyo Telefishanka, halka garabka ay is hayaan ee dhinaca saaray Madaxweynaha Somaliland si baaxad leh loogu buunbuuniyo.

wasaarada warfaafinta.jpg

DEGDEG: Qaraxii 3aad Ee La Kowsaday Khilaafka KULMIYE Oo  Fiidkii Ka Dhacay Kambalka Aqalka Madaxtooyada JSL Ee HARGEYSA  

0

Qarax loo addeegsaday Walax gacan ku samays ah, ayaa ka dhacay goor dhaweyd meel waxyar u jirta Aqalka Madaxtooyada Somaliland.

Qaraxan oo ka sanqadh yaraa kuwo habeenno sii horaysay ka dhacay Magaalada, ayaa waxa uu ka dhacay afaafka hore ee Wasaaradda Caddaalada, waxaana loo qabtay hal qof.

Goob-joogeyaal ayaa Hubaal Media u xaqiijiyay in qofka la qabtay dhaawac ka soo gaadhay wajiga , kaasoo la tuhunsanyahay inuu isagu fuliyay.

dad kale oo aan wali tiraddoodu sugnayn ayaa la sheegay inay dhaawacyo ka soo gaadheen.

“wuxuu ka dhacay laamida dhinaceeda oo u dhaxaysa Wasaaradda Cadaaladda iyo Taliska Asluubta, meel wax yar u jirta Inshaarada Madaxtooyada ee Isgoyska ah”sidaas waxa GNA u sheegay goob-jooge kale.

hargeysama jiro wax war ah oo ka soo baxay laamaha ammaanka dalka, dhacdaduna waxay dhacday goor wakhti yar ka horaysay salaadii Maqrib.

Wariye ka tirsan Hubaal Media oo goobta ka agdhawaa ayaa sheegay inay Ciidamo tiro badan goobta la keenay, isla markaana dad tiro badan isugu soo uruureen.

Qaraxyo hore

Qarax shaani la mid ah kan ayaa habeen afaraad ka dhacay isla goobtan, kaasoo dayrka Wasaaradda Cadaalada waxyeelo gaadhsiiyey.

Ciidanka Ammaanka ayaa dad tiro badan u xidh-xidhay qaraxyada hore oo laba habeen oo isku xigta la fuliyay.

Siilaanyo oo arrimo siyaasaddeed ku xidhiidhiyey

Madaxweynaha Somaliland Axmed Maxamed Maxamuud Siilaanyo oo shalay ka hadlay ammaanka dalka ayaa ku hanjabay inay dawladdu gacan bir ah ku qabanayso dadka falalkan ku lug leh.

Madaxweyne Siilaanyo ayaa ku eeddeeyay dad uu sheegay inay hogaaminta dalka doonayaan iyo kuwo Hay’addaha amniga ka tirsan  oo uu aanu magacyo dhabin.

Waran cadde iyo Fadal oo Khilaafka Kulmiye u sibir -saaray

Wasiirka Arrimaha Gudaha iyo Taliyaha Bilayska oo iyaguna ka hadlay qaraxyada noocan ah oo lix sanno ka hor dhawr jeer Magaalada laga qarxiyay, ayaa sheegay inay la bilaabmeen Khilaafka xoogaystay ee Xisbiga Talada haya.

Dadka loo xidh-xidhay tuhunnada qarax shaaniyadan waxa ka mid ah xubno ka mid ah Taageerayaasha garabka Hogaanka Xisbiga talada haya.

Ciidamada ammaanka ayaa habeennadii ugu dambeeyay hawl-gallo dheeraad ah ka sameeyey Magaalada Hargeysa iyo Magaalooyinka kale ee waaweyn