Guriga Blog Page 2

Hargeysa: Nin Mindi Ku Weeraray Wiil 14-jir ah

0

Hargeysa, (Hubaal) –  Abaaro Labadii Duhurnimo ee shalay ayaa Nin ku hubaysani Mindi waxa uu ku weeraray Arday 14 jir ah oo ka soo baxay Imtixaanka Dugsiga Xaafada Sheekh Nuur ee Magaalada Hargeysa, sida ay HCTV u sheegeen dad goobjoog ah.

Ninka Mindida sitay ayaa laba jeer Ardayga kaga dhuftay Misikta iyo Bawdada, waxaana Ardayga ka soo gaadhay dad goobta joogay.

Ilaa iyo hadda ma cada sababta dhabta ah ee ninkani u weeraray Ardayga, balse Axmed Cabdilaahi oo ka mid ahaa dadkii goobta joogay ayaa sheegay in markii uu waydiiyey sababta uu Ardayga midida ula dhacay ayaa sheegay inuu u sheegay inuu ka amaan waayey.

Ciidamada Bileyska ee Saldhiga Bileyska ee xaafadda Sheekh Nuur ayaa xidhay ninka dhaawacyada u gaystay Ardayga lskuulka ka soo baxay.

Maxkamadda Gobolka Maroodi-Jeex Oo Xukun Ku Riday Tifaftiraha HCTV

0

SOLJA Oo Ka Hadashay Xukunka maxkamadu Ku Ridday Tifaftiraha HCTV, Cabdiqaadir Saleebaan Casayr (Coday)

Hargeysa, (Hubaal) – Maxkamadda Gobolka Maroodi-jeex ayaa shalay xukun ku riday Tifaftiraha HCTV Cabdiqaadir Saleebaan Casayr (Coday) oo mudo laba bilood ah ku xidhnaa xarunta dambi baadhista ee magaalada Hargeysa ee CID-da loo yaqaano. Maxkamaddu waxa ay ku xukuntay Tifaftire Cabdiqaadir Coday, Hal sano oo xadhig ah iyo saddex milyan oo Somaliland Shiling ah oo ganaax ah.

Xukunkan Maxkamadda Gobolka Maroodi-Jeex ay ku riday Tifaftiraha HCTV ayaa waxa ka hadlay Gudoomiyaha Ururka Suxufiyiinta Somaliland Maxamuud Cabdi Jaamac (Xuuto), waxaanu yidhi “Maanta waxa Maxkamadda Gobolka Maroodi-jeex ay xukun ku riday Tifaftirihii HCTV Cabdiqaadir Saleebaan Coday, kaas oo muddo laba bilood ah ku xidhnaa magaalada Hargeysa, iyadoo damaanadii nalaga diiday in lagu siidaayo Cabdiqaadir Coday.

Maanta ayaa dacwadii dhagaysigeedu mudada labada bilood ah soo socday ay maxkamaddu go’aan ka gaadhay, waxa ay maxkamaddu ku xukuntay hal sano oo xadhig ah iyo saddex milyan oo ganaax ah, runtii urur ahaan waanu soo dhaweynay xukunkaasi, sifo kasta markii hore ha ku qaldanaadee ama ha loo maree, xukunkaasi waanu soo dhaweynay. Waxaananu doonaynay in aanu marno nidaamka aanu Cabdiqaadir Coday hawshiisa ku dhamayn lahayn, hase yeeshee waxa isla markiiba racfaan ka qaatay go’aankii maxkamadda, Xeer-ilaalinta, taas oo marka nidaamka sharciga ah la eego ay xaqu u leedahay hadii aanay ku qancin xukunkaasi, si anaguba hadii aanu u arkayno in aanu xukunkaasi noo cuntamayn aanu racfaan uga qaadan lahayn.

Hase yeeshee waxaanu u aragnaa talaabo xukuumaddu ay qaado oo adag ay tahay, markii horeba anaga oo u arkaynay in xukunkaasi sifihii hore ee loo maray aanu sharci ahayn,” ayuu yidhi Gudoomiyaha Ururka Suxufiyiinta Somaliland ee SOLJA, Maxamuud Cabdi Jaamac (Xuuto).

“Waa Iyadoo La Yidhaa, Saleebaan Gaal Iyo Guurtidu Meesha Haka Baxaan”

0

Buur-madow Oo Xukuumada Uga Digay Fara-gelinta Gudida Cusub Ee Doorashooyinka

Hargeysa (Hubaal)- Boqor Cismaan Aw Maxamuud (Buurmadow) oo ka mid ah Salaadiinta dhaqanka ee Somaliland, ayaa waxaa uu ka hadley muranka xoogan ee ka taagan gudida cusub ee Koomiishanka Doorashooyinka Somaliland. Buurmadoow ayaa waxaa uu uga digay xukuumada uu hogaamiyo Madaxweyne Muuse Biixi in ay fara geliso muranka ka dhex taagan gudiddaasi cusub ee Doorashooyinka.

Boqor Cismaan Aw Maxamuud Buurmadoow ayaa sheegay in aanay habayaraatee marnaba deegaankoodu aqbali doonin in la kala diro gudida cusub ee Doorashooyinka Somaliland. “Waa Nidaam ama hay’ad jirta oo sharci ah, waxay ka dhigan tahay iyadoo  Faysal Cali-waraabe ama xisbiga Ucid oo la yidhaa doorashada ma geli karo ama xisbiyada ha la baabiiyo.” Ayuu yidhi Buur-madow

Boqor Buurmadoow ayaa waxaa uu sidoo kale ka digay in Xukuumada Madaxweyne Biixi ay si gaar ah u fara geliso guddoomiyaha cusub ee Koomiishan doorashooyinka Somaliland Cabdirashiid Riyo-raac. “Waa iyadoo la yidhaahdo, Saleebaan gaal iyo guurtidu meesha haka baxaan, maaha arrin shakhsi ah.” Ayuu yidhi

Sidoo kale, waxa uu Buurmadoow sheegay in Beeshoodu ay ku khasaartay doorashadii ay doorteen Madaxweyne Muuse Biixi.

Waa Kuma Sarkaalka Ka Tirsan D/Hoose Ee Hargeysa Ee Uu Shaqo-Wanaaga Ku Majeertay Madaxweyne Ku-xigeenku?

0

“Intii Aanu Kormeerka JPLG-Ga Ku Jirnay Waxa Aad Noo Soo Jiitay, Dadkii Ka Shaqaynayey Dawladdaha Hoose Inanka Ka Shaqeeya Waaxda Arrimaha Bulshada Dawladda Hoose Ee Hargeysa…”C/Raxmaan Saylici Madaxweyne Ku-Xigeenka JSL

 Hargeysa(Hubaal)-Madaxweyne ku-xigeenka Somaliland Cabdiraxmaan Cabdilaahi Ismaaciil Saylici oo todobaadkii hore soo gabagabeeyey socdaal dheer oo uu gudaha dalka ku soo maray degmooyinka uu ka socdo mashruuca maamul-daadejinta Dawladdaha hoose ee JPLG-ga loo yaqaano, ayaa amaan aanu cidla la wadaajin iyo bogaadin u jeediyey Agaasimaha Waaxda arrimaha bulshada dawladda hoose ee caasimada Hargeysa Khadar Yuusuf Cali, kaasoo uu ku majeertay shaqo wanaag iyo in uu fuliyey waajib heerkiisu sareeyo, isagoo fahamsan shaqada uu xafiiskiisu bulshada u hayo.

Madaxweyne ku-xigeenka ayaa laba shir oo muhiim ah kaga dhawaaqay in Sarkaalkaasi mudan yahay in la abaal mariyo oo ugu yaraan lagu maamuso bilad-sharaf uu mutaystay, isagoo shahado-sharaftaasina ku guddoonsiiyey shir 6-dii bishan Janaury lagu qabtay qasriga Madaxtooyada, kaasoo ku sugnaayeen wakiillo ka socda dhamaan bah-wadaagta JPLG-ga oo ay kamid yihiin madax ka socday Hay’adda UNICEF iyo Wasaaraddaha Dawladda ee mashruucan la shaqeeya.

Madaxweyne ku-xigeenka ayaa bixinta shahaado-sharaftan ka balanqaaday shir uu Madaxda dawladda hoose ee Hargeysa kula yeeshay 17 bishii December ee sanadkii hore xarunta Dawladda hoose, kaasoo ka dambeeyey kormeer uu ku sameeyey mashaariicda laga fuliyey JPLG-ga, waxaanu madaxweyne ku-xigeenku tilmaamay in agaasime khadar uu muujiyey dedaal iyo waxqabad ka mug weyn degmooyinka kale ee uu kormeerka ku tegay.

“Aad iyo aad ayaan ugu hambalyeynayaa dawladda hoose ee Hargeysa oo ay hogaaminayaan, maayirka, maayir ku-xigeenka iyo xoghayuhu sida ay dedaalka uga sameeyeen maamul-daadejinta JPLG-ga oo maanta wax badan laga qabtay waxbarashadii iyo caafimaadkii” ayuu ka sheegay shirkaasi.

Madaxweyne ku-xigeenku isagoo ka hadlaya shaqo-wanaaga Agaasime khadar waxa uu shirkaasi kaga dhawaaqay” Shaqada fahamkeeda iyo masuuliyada nin waliba inta uu ka dhigto weeyaan bina-aadamka, anigu waxaan leeyahay Ninka khadar la yidhaahdo ee waaxda arrimaha bulshada dawladda hoose ee Hargeysa halkaasaanu shahaado weyn ku siinaynaa oo abaal-marin weyn ah, sababtoo ah bina-aadamku isma qariyo oo intii aanu meel soo marnay qof waliba wuxuu lahaa waa Nin shaqadiisa ka adag oo nala joogga oo wixii loo soo dhiibay na soo gaadhsiiya, markaa waan hambalyeynaynaa Inankaa runtii shahaadana waanu siinaynaa.”ayuu yidhi.

Cabdiraxmaan Cabdilaahi Ismaaciil Saylici oo kormeerkiis JPLG-ga ku soo maray 8 Magaalo oo ay kamid yihiin, Burco, Berbera, Sheikh, Oodweyne, Saylac iyo Hargeysa, ayaa mar kale khudbad uu kaga warbixinayey natiijada kormeerkaasi ku soo qaaday “Intii aanu kormeerkaasi ku jirnay waxa aad noo soo jiitay xagga shaqo wanaaga, dadkii ka shaqaynayey dawladdaha hoose Inanka ka shaqeeya waaxda arrimaha bulshada Dawladda hoose ee Hargeysa oo runtii soo jiidasho gaar ah lahaa shaqadiisu nagu samaysay, waxaanan maalintii u dambeysay ee aanu D/hoose ee Hargeysa la joognay aan u balanqaaday anigoo ah madaxweyne ku-xigeenkii iyo hogaamiyihii Champion-ka JPLG-ga in aan shahaado gaar ah siino”.

Madaxweyne-ku-xigeenku wuxuu mar kale ku sababbeeyey maamuuska Agaasimaha “waxaanu ku mutaystay mudada yar ee ay Magaalada Hargeysa ku jirtay maamul-daadejinta, sida uu isugu xidhay hay’addihii dawladda iyo bulshadii oo uu meel kastaba ugu dhaadhacay oo raali-gelin badan ka muujisay oo tidhi wuxuu na soo gaadhsiiyey wixii ka imanayey dawladda hoose. runtii markaa xil gaar ah ayuu muujiyey oo masuuliyada waa la kala leeyahay, daacadnimada waa la kala leeyahay, kolkaa inankaasi aad iyo aad ayuu noo soo jiitay, idinkoo dhamaantiin wada mahadsan oo shaqo wanaagsan qabtay”ayuu yidhi Madaxweynuhu.

Gebagebadii shirkaasi, ayuu madaxweyne ku-xigeenku guddoonsiiyey shahaado-sharafyo Agaasime Khadar Yuusuf Cali iyo xubno kamida maayirrada Dalka. waxa kale oo isla munaasibadaasi shahaado lagu guddoonsiiyey sarkaal ka socday Hay’adda UNICEF.

Si kastaba ha ahaatee, iyadoo ay tahay markii ugu horaysay ee Madaxweyne ku-xigeenku sidan oo kale u maamuso agaasime waaxeed shaqo ka haya Dawladdaha hoose, waxa ay arrintani dhiiri-gelinaysaa in ay madaxda dawladdaha hoose ee Khadar dhigiisa ahi dedaal badan muujiyaan, si iyagana mar kale loo qiimeeyo.

Somaliland Oo Cabasho La Xidhiidha Kaalmada Iyo Dhaqaalaha Ay Qaramada Midoobay Iyo Dalalka Caalamku Bixiyaan U Dirtay Xoghayaha QM

0

Madaxweynaha Somaliland Oo Kulan La Yeeshay Ergayga Qaramada Midoobay Ee Soomaaliya

“Waxa Aanu Wakiilka Ka Codsannay Inuu Farriin Ahaan U Gudbiyo Xoghayaha Qaramada Midoobay In Saluug Weyni Nagaga Jiro Waxtarka, Dhaqaalaha Iyo Deeqaha Laga Helo Jimciyadda Quruumaha Ka Dhaxaysa Iyo Dalalka Kale Ee Caalamka” Wasiirka arrimaha dibedda, wasiir Yaasiin Xaaji Maxamuud Xiir (Faratoon)

Hargeysa (Hubaal) – Madaxweynaha Somaliland Md. Muuse Biixi Cabdi ayaa xafiiskiisa ku qaabilay Ergayga Qaramada Midoobay u qaabilsan Soomaaliya, Mr. James Swan oo socdaal ku jooga Hargeysa. War-saxaafadeed ay khamiistii Madaxtooyadu ka soo saartay kulanka dhex maray Madaxweynaha iyo Ergayga Qaramada Midoobay ee Soomaaliya ayaa isagoo dhamaystiran u qornaa sidan: “Madaxweynaha Jamhuuriyadda Somaliland, Mudane Muuse Biixi Cabdi, ayaa maanta xafiiskiisa kulan kula yeeshay wefti ballaadhan oo uu hoggaaminayo wakiilka gaarka ah ee xoghayaha guud ee qaramada midoobay u qaabilsan Somaliland iyo Soomaaliya, Ambassador James Swan.

Kulanka uu madaxweynuhu la qaatay weftiga uu hoggaaminayo wakiilka gaarka ah ee xoghayaha guud ee qaramada midoobay u qaabilsan Somaliland iyo Soomaaliya oo ka qabsoomay xarunta qasriga madaxtooyada, ayaa  diirradda lagu saaray arrimo door ah oo salka ku haya xidhiidhka wada-shaqayneed ee Somaliland iyo qaramada midoobay  u dhexeeya iyo dareenka ay Somaliland ka qabto kaalinta ay qaramada midoobay iyo beesha caalamkuba kaga jiraan horumarka Somaliland.

Wasiirka wasaaradda arrimaha dibadda iyo iskaashiga caalamiga ah  Prof. Yaasiin Xaaji Maxamuud Xiir (Faro-toon) oo markii kulanku soo dhammaaday saxaafadda la hadlay, ayaa shaaciyey in madaxweynuhu wakiilka qaramada midoobay u guntay farriimo kala duwan oo la xidhiidha horumarka ay Somaliland ku tallaabsatay muddadii ay jirtay, waxana isaga oo arrimahaas ka hadlaya uu yidhi; “waxyaabo badan baa kulanka lagaga wada hadlay, arrimo badan baa la isla soo qaaday oo ay madaxweynaha iyo weftigu ka wada hadleen, arrimaha ugu muhiimsanna waxa kamid ah waxa ay Somaliland u gudbisay wakiilka inuu xoghayaha guud ka gaadhsiiyo farriimo ay kamid yihiin in muddo Soddon sanno ah ay Somaliland hanatay oo ka shaqaysay qaddiyaddeeda iyo madax-bannaanideeda oo ay danaheeda dhammaamtood iyadu gacanta ku hayso, haddii ay tahay dhulkeeda, baddeeda, hawadeeda iyo maamulkeedaba, mid walbana ay ku guulaysatay inay ka shaqayso nabaddiisa iyo xasiloonidiisa.”

Wasiirku isaga oo hadalkiisa sii wata uu hoosta ka xarriiqay in xukuumadda Somaliland ay muujisay walaaca ay ka qabto kaalmada ay qaramada midoobay iyo dalalka kale ee caalamkuba bixiyaan iyo sida ay qaran ahaan u saluugsan tahay, “Waxa kale oo aanu wakiilka ka codsannay inuu farriin ahaan u gudbiyo xoghayaha qaramada midoobay in saluug weyni nagaga jiro waxtarka, dhaqaalaha iyo deeqaha laga helo jimciyadda quruumaha ka dhaxaysa iyo dalalka kale ee caalamka ee jimciyadda quruumaha ka dhaxaysa ku jira, haddii ay tahay dhinaca  dhisidda kaabayaasha dhaqaalaha, shaqo-abuurka iyo caawinta iyo arrimaha ay bulshadu u baahan tahay ee waxbarashada, caafimaadka iyo biyaha uu mid walba saluug badani nagaga jiro waxtarka caalamka,” ayuu yidhi wasiir Yaasiin Xaaji Maxamuud Xiir.

Wasiirku waxa uu sidoo kale sheegay inay ergayga u xaqiijiyeen inay Somaliland ka gudubtay dhammaanba wixii khilaaf ahaa, islamarkaana ay ka dhammaysatay wixii khilaaf ahaa ee dhexdeeda ka jirey, isaga oo madaxweynuhu u sheegay wakiillka inay Somaliland diyaar u tahay inay la garnaqsato Soomaaliya oo kala dooddo arrimaha masiiriga ah.

Dhinaciisa,  wakiilka gaar ah ee xoghayaha guud ee qaramada midoobay Ambassador James Swan oo isaguna kulanka kaddib warbaahinta la hadlay waxa uu caddeeyey inay qaramada midoobay ka go’an tahay inay sii wadaan hawlaha shaqo iyo mashaariicda  ay ka wadaan gudaha Somaliland, islamarkaana ay xukuumadda Somaliland uga mahadnaqayaan sida habsamida leh ee ay u wada shaqeeyaan.

Kulanka waxa madaxweynaha ku wehelinayey madaxweyne-ku-xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici) iyo wasiirrada wasaaradaha Arrimaha dibadda iyo iskaashiga caalamiga ah iyo horumarinta maaliyadda..”

“Sida Aynnu Gacan-ku-dhiiglaha U Nacnay, Waa Inaynnu Carrab-ku-dhiiglahana U Nacno”

0

Sheekh Maxamed Sheekh Cumar Dirir

Hargeysa- (Hubaal) Sheekh Maxamed Sh Cumar Dirir ayaa bulshada ku baraarujiyey in dadkii hore saalixiyiintu ilaashan jireen diintooda iyo ajarka camalka ay sameeyaan inka badan inta aynu ilaashano aduunyada aynu haysano, loona baahan yahay ku deyashadooda.

Khudbadii Jimcaha ee shalay oo Sheekh Maxamed kaga hadlay halista xadgudubka sharafta iyo cirdiga qofka Muslimka, taasoo dadka qaarkood u haystaan waxyar in qofka sharaftiisa lagu xadgudbo. Waxaynu tafaasiil ka bixin doonaa mowqifka sharcigu ka taagan yaha iyo daliilada ku soo arooray iyo dadkii wanaagsanaa ee innaga horeeyey siday ahaayeen,

“Marka u hore nusuus badan ayaa ku soo aroortay oo ka digaysa qofku inaanu ku xadgudbin sharafta dadka, iyo sida loogu baahan yahay in qofku ilaaliyo carabkiisa. Carabka oo ka mid ah nicmooyinka Ilaahay SW bixiyey kuwa ugu waaweyn, Ilaahay-na SW inoogu manno sheegtay, “Miyaanan idiin siin Carab, Laba-dibnood io Laba Indhood”. Bal waxaad ka warantaa qofka hadalku iska taagay, ee doonaya inuu wax cabiro, ee waxba kuu sheegi kari la’, waxaad sawirataa qofka waxba dhadhamin kari la’ macaan iyo qadhaadh, nimcooyinka  Carabka ee Ilaahay SW inoogu manno sheeganayo ayuu ku jiraa, laakiin, culayskiisu wuu yaryahay, halistiisuna wa weyn tahay, dembi weyn iyo ajar weyn labadaba Carabkuu ka yimaadaa. Markaa arrinka aynu aad u adkeynayno, sida Diinteenu innagu waaninayso ilaalinta Carabka weeye.

Sheekh Maxamed ayaa sheegay in dadku dareemaan in waxa ay ku hadlayaan habeen iyo maalin ay yihiin wax qoran Ilaahay SW agtiisa, maalinna laguu soo bandhigi doono. Sida Ilaahay SW inoo sheegay, “Qofku waxuu ku hadlayo malaa’ig ayaa qoraysa” adigu hadaad wax kale ka shaqenaysay, isaguna hadalkaaga ayuu qorayaa.

“Ilaahay waxuu ka digay qofka dadka isha iyo afka ka xamanaya, “Halaag waxa leh qofka dadka isha iyo afka ka xamanaya” qofka dadka xamanaya, iskuna diraya iyo in la isku dheeldheelo ayuu Ilaahay SW ka digay.

Nebi Maxamed NNKH ummada iyo asxaabta ayuu waaniyey, waanno dheer oo wax-sheegnimo ku jirto, markaa ayey saxaabadii yidhaahdeen, Rasuul Allow ‘miyaa naloo qabanayaa waxaan ku hadlayno? Markaa ayuu Nebigu NNKH ku yidhi “Dadka waxa afgembi naarta ugu ridaya waxa u sabab ah Carabkoodu waxuu u keenay, ee xumaan uu ku geystay”. Nebigu NNKH isagoo ummadiisa la doonaya inay Jannada galaan ayuu u sheegaya fursadii ay ku gaadhi lahaayeen, sida macnahii xadiisku ahaa “Qofkii ii damaanad qaada inuu afkiisa xaaraanta ka hayo, ibtiisana sinnada, waxaan u ballanqaadayaa Jannada”.

Asxaabigii Sufyaan ibnu cabdillahi a saqafi su’aal qiimo leh ayuu Rasuulka CSW inoo weydiiyey, waxuu yidhi ‘Ii sheeg shaygaad aad iigu cabsi badan tahay, si aan isaga ilaaliyo’  waxuu Rasuulku CSW ugu jawaabay “Carabka” iska ilaali. Waxaad ku badbaadaysaa hadalka intaanad odhanin inaad miisaanto, afar qeybood kuu yahay, ma shar baa, ma khayr baa, ma bilaa micnaa, ma labaduu isugu jiraa. Hadalku intaa kama baxo, ama waa shar ama khayr, saddex iskaga tag, waxii shar ah, waxii shar iyo kheyr isugu jira iyo waxii bilaa macno ah, keliya dooro waxii kheyr ah. Rasuulku CSW waxuu inoo tilmaamay “Qofka Ilaahay SW iyo aakhiro rumeeyey kheyr ku hadal ama iska aamus” imaamu Nawawi markuu sharxayo waxuu yidhi, taasi waxay ku suurtoobaysaa horta qofku intaanu hadlin uu miisaamo waxuu odhan doono, kana fiirsado, laakiin aanu afka sii deynin.

Sheekh Maxamed ayaa ku baraarujiyey ummada in Nebigu NNKH ehelkiisa iyo asxaabtaba uga digi jira waxa xanta la yidhaahdo io in Carabka la sii daayo, cidna uguma dulqaadan jirin, ee halkeeda ayuu ku joojin jiray, waana mid mudan inaynu kaga deyano.

“Nebiga NNKH xaasaskiisi mid ka mid ah ayaa tidhi ‘safiya waxa kaaga filan inay sidaa tahay’ iyadoo ujeeda xaas kaloo Nebigu qabay,(qolaha taariikhud waxay xusaan way gaaban tahay keliya ayey tidhi), Rasuulku CSW wuu joojiyey oo waxuu yidhi, “Kelmadaa hadii badda lagu dari lahaa, way bedeli lahayd” (ma urteedaa, ma dhiigeedaa) waxay tahayba. Rasuulku CSW ummada markuu dardaaranka u jeedinayey, ugana digayey dulmiga ay gelayaan, ma ahayn dhiigooda la daadinayo keliya, balse cirdiga iyo sharaftoodana wuu kala hadlay.

Haddayno camal badan samaynayno, balse ummada aynu Carabka la dhacano ka deyn weyno, waxeenu waxay noqonayaan foosto gun la’ oo aynu dhaaminayno. Nin baa Nebiga NNKH u yimi, waa tusaale cajiib ah, laba dumar ah ayuu uga warbixiyey, waxuu yidhi heblaayo soon badan iyo saddaqo badan way bixisaa, laakiin jaarkeeda ayey ku dhib badan tahay oo carabkeeda laga fadhiyi la’ yahay, “Naarta ayey ku jiraa” Ilaahay baynu ka magan galnee, ayuu Nebigu NNKH yidhi.

Heblaayana soon badan iyo saddaqo badan ma samaysee, laakiin jaarkeeda ka nabadgalay, “Jannada ayey gelaysaa” Ilaahay hoy ha inooga dhigee, ayuu Nebigu NNKH yidhi.

Waxa muhiim ah in waxa aynu qabanayno wax badan aynu eegno, sida dadkii innaga horeeyey inbadan ay u ilaalin jireen carabkooda, hadalka iyo kelmada ka soo baxaysa. Siyaabaha ay isku ilaalin jireen waxa ka mid ah dadka belaayooyinka iyo xanta ku gelaya way ka warwareegi jireen inay la kulmaan. Caalimkii weynaa Ibraahim a Naqaci ayaa wax u sheegaya inantii shaaqiyada guriga u ilaalinaysay, ee hadba qofka u yimaada u sheegaysay, markaa waxuu ku yidhi ‘marka hebelkaasi kuu yimaado waxaad tidhaahdaa, masaajidka ka raadi dheh, laakiin ha odhanin halkan ma joogo, ilayn waan joogaaye’ waa dariiqo uu kaga dabaalanayo qofka dembiga u soo jiidi kara.

Waxyaabaha ay iskaga ilaalin jireen Carabka wax ka mid ah iyagoo koobi jiray hadalkooda, aamuska iyo urursanaanta way ku dedaali jireen, oo hadalkan faraha badan ee aynu ku xiiqayno may lahayn. Waxuu lahaa imaamkii Xasan ibnul bashaar muddo soddon sannadood kuma hadlin hadal kelifi kara inaan cudurdaar ka bixiyo. Innagana hadalkeenii markuu batay ee qofkii dhacdhaciisa lagu qabsado, six un wax u sheeg sixir ka daran, sidaa umaan jeedin; hadalku waa mergi, si khalad ah ayaa loo fasiray, markale raali iga ahaada, waxaa oo dhan wax aka yeedhsiinaya waxa weeye dadkii oo hadalka ay odhanayaan aan ka fiirsanayn.

Imaamkii Bishruk ibnu mansuur la odhan jiray waxuu lahaa, isagoo dadka ku waaninaya hadal yaraanta ‘maanta oo dhan waxaan ku hadlay hadaan is idhaado dib u soo tiri waan tirin karaa’ bal innagu ma tirin karnaa 12 saacadood la soo dhaafay waxii aynu ku hadalnay, wax la garan karo maaha tiradooda? Taasi waxay tilmaamaysaa inaynaan xukumin waxa afkeena ka soo baxaya. Waxay ahaayeen dad u arkayey qofka iyaga xumaynaya ama xamanaya inay ka faa’iidaysanayaan, hadii ay iyagu wax xantaana iyaga laga faa’iidaysanayo. Diintooda iyo ajarkooda ayey ilaashanayeen, in ka badan aduunka inta aynu ilaashano innagu.

Imaamkii Carbdiraxmaan ibnu wahbi ayaa yidhi, hadii aanan karaahiyeysanayn in Ilaahay SW la caasiyo, casrigan dadka jooga inay I xantaan ayaan jeclaan lahaa, maxaa ka wanaagsan kitaabkaaga oo maalinta qiyaame uu ka soo baxo camal aanad samaynin adiguna aanad ogeyn. Xassanul basri, taabicigaa ayaa la yidhi hebel baa ku xanta oo xantaada badiya, wuu u fiirsaday oo inay jirto ayuu ogaaday, wuxuu u hadyadeeyey madiibad weyn oo timir ah, wuxuu yidhi u sheega ‘waxaan uga cudurdaaranayaa, waxuu I siiyey iyo waxaan siiyey inaanay isku mid ahayn, isagu ajarkiisi ayuu I siiyey, anniguse aduun kooban ayaan siiyee, ha iga raali ahaado’.

Sheekh Maxamed oo tafaasiil ka bixinayey akhlaaqdii dadkii wanaagsanaa ayaa sheegay inay u arkayeen carabka oo la sii daayo inuu keen ur iyo arag xumo,

“Nin salafkii ka mid ah ayaa saaxiibkii waxuu ku yidhi, wakhtigii Rasuulka CSW waxa la dareemi jiray xantu urta ay leedahay iyo macsiyadu arag xumida ay leedahay. Imika dadkii maxaa ku dhacay ayuu yidhi, markaa ayuu ugu jawaabay sankii ayaa ka buuxsamay markii urtii iyo xumaantoodii  ay badatay, laakiin dadkii saalaxiinta ahaa Nebi Maxamed NNKH iyo saxaabadii wacnayd iyaga waxan ayaa ku yaraa oo wuu u soo urayey.

Waxyaalaha ay ku yarayn jireen halista Carabka dadkii saalaxiinta ahaa oo sheekh Maxamed ka hadlay ayaa yidhi,

“Cumar ibnu Cabdicasiis ilaahay ha u naxariistii, Madaxweynahii Muslimiinta ee Caadilka ahaa ayuu nin u yimi oo u sheegay in ninka hebel la yidhaahdo wuu ku xantaa, wuu ku yidhi, soo fadhiiso, saddex arrimood kala dooro in arrinkaa marka baadhitaan lagu sameeyo uu been noqdo, oo markaa aad faasiq noqotid, sida Ilaahay SW aayad inoogu sheegay “Hadii faasiq war idiin keeno iska hubiya”, in marka arrinkaa baadhitaan lagu sameeyo uu run noqdo, waxaad soo geli doonaa sida Ilaahay SW aayad kale ku sheegay “ka ilaahay ku ceebeeyey inuu dadka isku diro” arrinka saddexaadna waa in layska kaa cafiyo,? Oo ceebta iyo isku dirka mu’miniinta aanad dib ugu noqon, ninkii ayaa cafiskii dalbaday.

Markaa waxaynu leenahay xanta, ceebaynta iyo cayda, sidii gacan-ku-dhiiglaha aynu u nacnay, waa inaynu carab-ku-dhiiglahana u nacno . Ilaahay ceebaheena ha asturo, camalkeenana ha wanajiyo, amin

Ururka SOLJA Oo Ka Dayriyey Xaaladda Caafimaad Ee Tifaftiraha HCTV Oo Laba Bilood Xidhan

0

Hargeysa, (Hubaal) – Ururka Suxufiyiinta Somaliland ee SOLJA ayaa war-saxaafadeed ay soo saareen maanta waxa ay kaga dayriyeen xaaladda caafimaad ee Tifaftiraha Telefishanka HCTV, wariye Cabdiqaadir Coday oo mudo xidhan.

Ururka Suxufiyiinta Somailand ee SOLJA waxa uu ku baaqay in la sii daayo saxafiga xidhan, sida lagu sheegay War-saxaafadeedka ka soo baxay Ururkaasi oo uu baahiyey Telefishanka HCTV, kaas oo u dhignaa sidan:

“Ururka Saxafiyiinta Somaliland ee SOLJA waxa ay walaac xoogan ka muujinayaan xaaladda caafimaad ee Tifaftiraha Telefishanka HCTV Cabdiqaadir Saeebaan Casayr (Coday), kaas oo la xidhay 17-kii November 2019-ka, muddo laba bilood ahna ku xidhan xarunta CID-da ee magaalada Hargeysa kadib markii Telefishanku uu baahiyey Warqad cabasho oo ay qortay shirkadd ganacsi oo gaar loo leeyahay ee Fly Dubai oo ay u qortay garoonka ay diyaaraduhu ay ka haadaan ee Cigaal International Airport.

Wariye Cabdiqaadir Coday ayaa intii uu ku xidhnaa Xarunta CID-da ee magaalada Hargeysa waxa la soo darsay xaaladdo caafimaad oo aad u daran oo ay ka mid yihiin Dhiig-Car iyo Wadne Xanuun, waxaanay Boolisku muddo shan jeer ah ay u qaadeen dhakhtarka si xaaladiisa caafimaad loola tacaalo,” Dhinaca kale ururka SOLJA waxa uu war-saxaafadeedkiisa ku sheegay in Qaabka loo xidhay Wariye Cabdiqaadir Coday ay baalmarsanayd hab-raaca sharciga Somaliland iyo xeerka Saxaafada Somaliland ee Lr 27/2004.

Australia: Shiishyahanno La Amray Inay Laayaan 10,000 Geel Ah!

0

Dawladda Ustareeliya Oo Sheegtay Oo In Geelaasi Uu Dhibaatooyin Ku Hayo Bulshooyinka Ku Dhaqan Deegaanada Fogfog

Canberra, (Hubaal) – Dawladda Australia ayaa amartay in la laayo 10,000 (10 kun) oo neef oo Geel ah oo ku nool kaymaha dalkaasi, sida lagu sheegay warbixin uu daabacya wargeyska The Australia. Dawladda ayaa amarkan ku sababaysay in Geelaasi uu dhibaato ku hayo bulshooyinka ku dhaqan deegaanada fogfog ee dalka, kadib markii abaar ba’ani ay ka dhacday qaybo ka mid ah wadankaasi. Shiishyahanno shaqo ka helay dawladda Australia ayaa Arbacada bilaabaya toogasho ay Geelaasi ku laynayaan. Qaar ka mid ah bulshooyinka dalkaasi ku dhaqan ayaa ka cadhooday laynta la amray Geelaasi in la sameeyo, iyagoo ku doodaya inuu Geelu sharaf ku leeyahay diinta ay rumaysan yihiin sidaasi awgeedna ay tahay in aan tallaabadaasi la qaadin.

Dalka Australia waxa todobaadkii lasoo dhaafay ka holcay dab xoog leh, dabkaasi oo baabiiyay dhir iyo xayawaano aad u badan.

Buuhoodle: Tirada Dadka U Geeriyooday Cudurka Shuban biyoodka

0

Agaasimaha wasaaradda caafimaadka, Dr. Xirgeeye Oo Faahfaahin Ka Bixiyey 10 Qof Oo Shuban Ugu Geeriyooday Widh-Widh

Hargeysa, (Hubaal) – Agaasimaha Guud ee Wasaaradda caafimaadka Somaliland, Dr. Maxamed Cabdi Xirgeeye ayaa shaacisay in 10 qof maalmihii u dambeeyey ay Shuban Biyood iyo Oof-wareen ugu geeriyoodeen deegaamo ka tirsan Buuhoodle. Agaasime Xergeeyo oo shalay warbaahinta kula hadlayey magaalada Hargeysa ayaa sheegay in dhakhaatiir iyo hawlwadeeno ka tirsan Wasaarada Caafimaadka Somaliland xaaladaha caafimaad daro ee ka soo kordhay deegaamadaasi Buhoodle. “Xanuunku waxa uu ka bilaabmay Widh-widh oo run ahaantii dad u badan caruur la keenayey ilaa dabayaaqadii bishii December, dad badan ayaa la keenay oo runtii usoo dhacay gaar ahaan xanuun Xumadd, Shuban iyo Oofwareen ah.

Xanuunadaasi waxay ahaayeen xanuuno xumadd xoogle iyo oofwareen uu ka dilaacay magaalada Widh-widh iyo hareeraheeda oo xanaanadii Widh-widh (MCH) la keenay dad aad u farabadan oo awoodiisa ka badan.

Markaa Wasaarada Caafimaadku way ka hawlgashay, waxaanu uga hawlgalnay inaanu xaruntana dawooyinka ka dirno, dad khubaro ah oo xanuunkaasi soo darsana aanu u dirno, gobolada u dhawdhaw oo uu ku jiro Buuhoodle iyo Laascaanood labadaba laga diro kooxo dhakhaatiir ah.

Waxoogaa dhimasho 10 qof ahina ay timid, waxa hadana jirtay in guud ahaan marka la eego dadkii tirade badnaa ee imanayey in si wanaagsan loo daaweeyey, gacantana lagu qabtay xaaladihii, sida ay noo sheegeen dhakhtarku ay hoos u soo dhacayso oo xaaladda Widhwidh ay soo hagaagayso,” ayuu yidhi Agaasimaha Guud ee Wasaarada Caafimaadka Somaliland, Maxamed Cabdi Xirgeeye.

Somaliland Oo Mar Kale Sheegtay Inaanay La Shaqaynayn Doonin Wadamada Xuduudaha La Leh Badda Cas

0

“Somaliland Waa Dal Madax Bannaan Dal Kale Uma Daba Fadhiisanayso Xuduudaheeda Badeed” War qoraal ah oo ka soo baxay Wasaarada Arimaha Dibada Somaliland

Hargeysa, (Hubaal) – War qoraal ah oo ka soo baxay Wasaarada Arimaha Dibada Somaliland ayaa lagu sheegay in “Jamhuuriyadda Somaliland waxay si toos ah ugu celineysaa mowqifkeedii hore ee ahaa inay ka fiirsato oo aanay iskaashi la yeelan siyaasadaha, barnaamijyada iyo howlaha wadamada xubnaha ka ah Carabta/Afrika ee xaduudda la leh Badda Cas. Somaliland ayaa kasoo horjeesatay shir wasiirrada arrimaha Dibadda waddamada Kulaala Badda cas iyo Gacanka Carabtu ku yeesheen waddanka Sacuudiga.”

Qoraalka ka soo baxay wasaaradda arrimaha Dibadda Somaliland ayaa lagu sheegay in Somaliland ay ku taagan tahay mawqifkeedii hore ee ahaa in aanay wax wadashaqayn ah la yeelaan waddamada iskakaashanaya Badda Cas iyo Gacanka Cadmeed ilaa inta la dafirayo xuquuqdeeda muhiimka ah.

“Somaliland waa dal madax bannaan dal kale uma daba fadhiisanayso Xuduudaheeda Badeed” ayaa lagu qoraalka.

Somaliland ayaa sheegtay in Xuduudeeda badeed oo dhererkeedu dhan yahay 850 KM ay ka ilaalisay in ay gabaad u noqoto Budhcad Badeeda iyo weliba Ururrada Argagaxisada. Shirka Sacuudiga ka dhacay waxa ka qayb-galay wasiirka arrimaha Dibadda Soomaaliya.