Guriga Blog Page 2

Al-shabaab Oo Weerar Culus ku Qaadday Saldhig Ciidammada Dawladdu Leeyihiin

0

Warbaahinta Dawladda Soomaaliya oo sheegtay in weerarkaasi lagu dhaawacay Afhayeenka guud ee Xarakada Al-shabaab

Aw-dhiigle (Hubaal) –  Kooxda Al-shabaab ayaa maanta Weerar culus ku qaadday Saldhig ay Ciidammada Millateriga Soomaaliya ka samaysteen deegaanka Aw-dheegle ee Gobolka Shabeelaha Hoose.

Warar kala duwan oo ka soo baxaya Weerarka ayaa sheegaya in dagaalyahannada Al-shabaab ay Saldhig Cusub oo Ciidammada Dawladdu ka samaysteen Aw-dheegle ay markii koowaad albaabkiisa la beegsadeen Gaadhi Waxyaabaha Qarxa laga soo buuxiyey, daqiiqado ka dibna gaadhi kale uu Xerada ku dhex Qarxay.

Warku wuxuu intaa ku darayaa in markaa ka dib uu dagaal ka dhex bilaabmay Ciidamo Al-shabaab ah oo xerada gudaha u galay iyo Ciidammada Dawladda.

Illaa hadda lama oga Khasaaraha dhabta ah ee Ciidammada Dawladda ka soo gaadhay Weerarkan isugu jiray Qaraxyada iyo dagaalka tooska ah, balse Warbaahinta Al-shabaab taageerta ayaa sheegaya in dagaalkaa ku dhinteen illaa 50 Askari oo Ciidammada Dawladda ka mid ah, Tobanaan kalena dhaawacmeen, laakiin ma jirto Cid Madax-bannaan oo sheegashadaa xaqiijin kartaa.

Geesta kale, Warbaahinta Dawladda Federaalka Soomaaliya ayaa maanta tebisey in Ciidammada Dawladdu ay dhaawac gaadhsiiyeen Afhayeenka guud ee Xarakada Al-shabaab, Cali Maxamuud Raage iyo Dagaalemayaal kale oo kooxdaasi ka tirsan. Warka ay Warbaahinta Dawladdu baahisay ayaa sheegaya in Hawl-gal qorshaysan oo Ciidammada Dawladda ee sida gaarka ah u tababbaran ka fuliyeen deegaanka Shaam oo hoos-taga Degmada Aw-dheegle ee Gobolka Shabeellaha Hoose lagu dilay 17 Xubnood oo Al-shabaab ka mid ahaa, halka lagu dhaawacay illaa 25 Dagaalemayaal kale, kuwaasi oo uu ka mid yahay Afhayeenka guud ee kooxdaasi, Cali Maxamuud Raage.

 

Warbaahinta Dawladda Soomaaliya oo soo xiganaysa Saraakiisha Sirdoonka ayaa ku warrantay in dhaawaca Cali Maxamuud Raage lagu hayo deegaanka Kuntu-waareey ee Gobolka Shabeelaha hoose, hase-yeeshee Hawl-galka oo la sheegay inuu dhacay 11-kii bishan ayaanay jirin Cid Madax-bannaan oo xaqiijin kartaa.

SOMALILAND: Xukuumadda Oo Sheegtay In La Gacanta Lagu Dhigay Qaar Ka Mid Ah Gacan-Ku-Dhiigleyaashii Ceel Af-Weyn Dilka Ka Geystay

0

Madaxweyne ku-xigeenka Jamhuuriyadda Somaliland, ahna ku simaha madaxweynaha oo Dhambaal Tacsi Ah U Diray Ehelada 7 Marxuum Oo Dorraad Ku Geeriyooday Ceel-Afweyn

Hargeysa (Hubaal) – Madaxweyne ku-xigeenka Somaliland, ahna ku-simaha Madaxweynaha Md. Cabdiraxmaan Cabdillaahi Ismaaciil (Saylici), ayaa ka hadlay Dil Deegaanka Ceel Af-weyn loogu geystay 7 Qof.

Madaxweyne ku-xigeenka oo Tacsi u diray Ehelada Dadka lagu laayey deegaanka Ceel Af-weyn ee Gobolka Sanaag, ayaa sidoo kalena sheegay in la qabtay qaar ka mid ah Dablaydii dilkaa geysatay xubno ka mid ah.

Sidaana waxa lagu sheegay Qoraal Tacsi ah oo ka soo baxay Madaxtooyada Somaliland, kaasi oo isagoo dhamaystiran u qornaa sidan:

“Madaxweyne ku xigeenka Jamhuuriyadda Somaliland, ahna ku simaha madaxweynaha Qaranka Somaliland, Mudane Cabdiraxmaan Cabdilaahi Ismaaciil (Saylici) isagoo ku hadlaya magaciisa, ka dawladda iyo ka shacbiga Somaliland, waxa uu dhambaal tacsi ah u dirayaa, qoysaska, ehelada, qaraabada, asxaabta iyo shacbiga Somaliland ee ay ka baxeen Alle ha u naxariistee Marxuumiintii ku geeriyootay shalay (dorraad) Ceel-afweyn oo dhammaa Todoba ruux oo afar ay haween yihiin. Iyadoo Ciidamada amnigu ay gacanta ku soo dhigeen qaar ka mida dablaydii geysatay fal-danbiyeedkaa foosha xun, laguna daba jiro intii kale, waxaana socda hawl-galka lagu baadi goobayo hadhaaga dablaydaasi iyadoo la horgeyn-doono sharciga, ehelada dadkooda ku waayey falkaasina waxa uu madaxweyne ku xigeenku ku adkaynayaa inay dejiyaan xaaladooda kana war-sugaan  hawl-galka ciidamada iyo horgaynta sharciga.

Ku simaha Madaxweynaha Somaliland, mudane Cabdiraxmaan Cabdilaahi Saylici, wuxuu ugu baaqayaa bulshada deegaanka ceel-afweyn inay xil iska saaraan adkaynta amniga. Xukuumadda Somaliland marnaba ma aqbalayso dhiiga dadka ehelka ah ee maalin walba macno la’aanta ku daadanaya.

Madaxweyne ku xigeenku waxa uu amrayaa ciidamada amaanka iyagoo gudanaya waajibaadkooda qaran inay sugaan nabadgelyada deegaankaasi, cid kasta oo falal amni daro ku hawlana ay gacan bir ah ku qabtaan.

Waxaanu Madaxweyne ku xigeenku marxuumiintaa ALLE uga baryayaa inuu naxariistii janno ka waraabiyo, qoyska, ehelada, qaraabada, asxaabta iyo shacbiga Somaliland ee ay ka baxeena samir iyo iimaan saadiqa ka siiyo, inta dhaawaca ahna uu caafimaad sareecana siiyo kana dulqaado dhibaatada…”

ALLAA MAHAD LEH

Maxamuud Warsame Jaamac

Af-hayeenka Madaxweynaha JSL.

Fool-Xumooyinka Ka Socda Ceel-Afweyn Iyo Khatarta Ay Leedahay Dilka Loo Gaysto Qof Muslim Ah

0

Maxamed Cirro, Hargeysa, Somaliland

Diinta islaamku ahmiyad aad u wayn ayey siisay nolosha qofka muslimka ah, waxayna shareecada islaamku waajibisay in la ilaaliyo, la dhawro, amnigeedana la sugo nafta iyo nolosha ruuxa muslimka ah, iyadoo Ilaahay (SWT) uu xaaraan ka dhigay in sifo aan sharci ahayn loo gooyo nafta muslimka.

Sida ku cad aayaadka qur’aanka kariimka ah, dilka badheedhka ah ama si ula-kac ah loogu khaarajiyo qof muslim ah oo Ilaahay iyo Nebi Muxamed (SCW) rumaysan waxa uu ka mid yahay dunuubta waaweyn ee lagu mutaysto cadhada iyo cadaabta Alle.

Aayadda 93-aad ee Suuradda al-nisaa, waxa uu Ilaahay (SWT) ku caddeeyey afar ciqaabood oo wehel u noqonaya cidda si badheedh ah u disha qof muslim ah, afartaas ciqaabood oo kala ah;

Naarta jahanama oo uu ku dhex waarayo

Cadhada Ilaahay oo dushiisa ahaata

Nacdasha Alle oo ku dhacda

Iyo Ilaahay oo u ballanqaaday inuu marsiiyo cadaab weyn

Haddaba, qofka si badheedh ah u dila naf muslim ah waxa uu si cad ugu xad-gudbay saddex xuquuqooq oo aan loo bannayn inuu ku xad-gudbo, waxayna saddexdaas xuquuqood kala yihiin;

Xaqa Ilaahay leeyahay ee ah inuu Alle waxna dilo, waxna nooleeyo.

Xaqa qofka uu dilay lahaa

Iyo xaqa ay leeyihiin qoyska iyo ehelka qofka la dilay

Waxa dambi weyn ah in qof muslim ah uu soo qaato qori ama hub kale, kadibna uu si badheedh ah ugu laayo dad muslimiin ah oo aan waxba galabsan, iyadoo ay weliba arrintaasi waqtigan aad ugu badan tahay dunida islaamka, gaar ahaan dalkeena Jamhuuriyadda Somaliland, waxaanna tusaale innoogu filan falalka foosha xun ee ka socda degaanka Ceel-afweyn ee Gobolka Sanaag, halkaas maanta (Isniin, 12 Augost 2019) lagu dilay shan qof oo isugu jira laba nin iyo saddex dumar ah, waana dil badheedh ah oo si ula-kac ah loogu gaystay dad muslimiin ah oo aannu Alle bannayn dilkooda.

Sida ku cad shareecada islaamka, qofka muslimka ah ee si badheedh ah u gaysta dil, waxa ku waajib ah inuu faraha ka qaado dambiyada waaweyn ee uu ku dhex jiro, kadibna uu Ilaahay (SWT) uga tawbad keeno, si uu Alle uga dhaafo xaqiisa uu ku xad-gudbay, isla markaana uu isku dhiibo qoyska ama ehelka cidda uu dilka u gaystay, kuwaasoo iyaguna xaq u leh inay codsadaan in loo qisaaso, xukun dil ahna loogu fuliyo ama inay mag-dhaw ka qaataan ama inay dar Ilaahay u cafiyaan.

Waxa kaloo dambiilayaal ah cidkasta oo gacan ka gaysata, haddii ay tahay taageero dhaqaale iyo mid hadal ama af ah, una fududaysa wax kasta oo sahlaya in qofku uu dil badheedh ah gaysto, waana arrin lagala xisaabtayo if iyo aakhiraba, waxaanna habboon in laga waantoobo dilalka sida badheedhka ah looga fulinayo dalka Somaliland ee lagu qudh-goynayo qof muslim ah, Ilaahay-na ha laga cabsado, dunuubta dhacaysana ha looga tawbad keeno. Waxa aan Ilaahay (SWT) ka baryayaa inuu innaga qabto dadka fidmo-abuurka ah ee daadinaya dhiigga dadkeena, waxaanna Dowladda iyo madaxda qaranka Jamhuuriyadda Somaliland waajib ku ah, xilna ka saaran yahay inay wax ka qabtaan fool-xumooyinka ka socda degaanka Ceel-afweyn, iyadoo lala imanayo ficil iyo qawl lagu suulinayo ceebta taala Ceel-afweyn.

 

Maxamed Cirro, Hargeysa, Somaliland

“Annagu Waa Soomaali-weyn Odhan Mayno, Laakiin Waxay Ka Muuqataa Ficilkooda”

0

Guddoomiyaha Xisbiga Waddani Oo Ka Hadlay Kulanka Madaxweyne Biixi Iyo Madaxda Soomaaliya

Hargeysa (Hubaal) – Guddoomiyaha xisbiga Mucaaradka ah ee WADDANI, ayaa ka hadlay kulan ay Magaalada Barakaysan ee MAKKA ee dalka Sucuudiga ku yeesheen  Madaxweynaha Somaliland iyo Wasiirro ka mid ah dawladda Federaalka Soomaaliya.

Sawir lagu baahiyey Baraha Bulshadu ku xidhiidho gelinkii hore ee shalay ayaa muujinaya Madaxweynaha Somaliland Md. Muuse Biixi Cabdi, Wasiirka Arrimaha gudaha Somaliland, Maxamed Kaahin Axmed iyo La-taliyaha gaarka ah ee Madaxweynaha Somaliland, Cali Maxamed Waran-cadde oo la Sawiran Wasiirrada Wasaaradaha Arrimaha dibedda, Maaliyadda, Kalluumaysiga Soomaaliya iyo Sarkaal ka mid ah Xafiiska Raysal-wasaaraha Soomaaliya.

Sawirkaa ay Masuuliyiinta Somaliland iyo kuwa Soomaaliya ka soo wada muuqdeen oo hadal-hayn badan ka dhex abuuray Bulshada ayaa waxa ka hadlay Guddoomiyaha Xisbiga Mucaaradka ah ee WADDANI, Md. Cabdiraxmaan Maxamed Cabdillaahi (Cirro) oo Saxaafaddu Su’aal ka waydiisay siduu u arko arrintaasi.

Guddoomiye Cirro oo ka jawaabaya su’aasha laga waydiiyey Sawirka Madaxweynaha Somaliland iyo Wasiirrada Soomaaliya ayaa yidhi “Soomaalidu waxay tidhaahdaa ‘Inaad saamo Jiiddiyo, Sanqadh-tirasho kala daa’.’ markaa waxay ila tahay way Caddahay, Shacabka reer Somaliland waa reer Somaliland, Annagu waa Soomaali-weyn odhan mayno, laakiin waxay ka muuqataa Ficilkooda, waxay Dadka ku caayayeen inay sameeyaana ceeb bay ku tahay..”

Dad Ka Badan 800 Qoys Oo Ku Dhaqan Xaafado Hargeysa Ku Yaalla Oo Ka Faa’ideystay Deeq Hilib Ah Oo Hayadda Iqaasada & Daryeelka Ay Ugu Talogashay Ciidal-Udxadda

0

Hargeysa (Hubaal) Hay’adda iqaasada iyo daryeelka ee magaalada Hargeysa ayaa gaybisey xoolhii ay ugu talogashay Ciidal-udxadda ee sanadkan 2019 taariikhda miilaadiga iyo 1440 taariikhda hijriyada.

Munaasibadda qaybinta oo ka dhacday hargeysa, ayaa waxa ka gayb galay mudane Khalid ba Akhdar oo ah madaxa ka socday xafiiska guud ee hayadda xarunteedu tahay boqortooyadda sacuudi Carabiya, Madaxa raabidada caalamka islaamiga Maxamed bin. c\karim al ciisa oo uu weheliyo madaxa hayadaiqaasada, C\casiis bin Axmed al sarxaan iyo madaxa xafiiska hay’adda ee Hargeysa oo horkacayey barnaamijka sanadkan, Iyadoo ay ka faa’idaysteen dad ka badan 800 qoys danyar ah uu ku nool magaaladda Hargeysa.

Barnaamijka lagu qaybinayay xoolaha udxadda ee sanadkan oo hay’addu ku qaybisay tiro dhan 400 neef oo adhi ah, ayaa lagu gaybiyey xaafada Digaale iyo xaafadda macalin Haaruun, iyadoo dadka xaafadahaasi ku nooli ay ka faa’ideysteen.

Hay’adda iqaasada iyo daryeelka ayaa ah hayadda muddo dheer ka shagaynasay Somaliland, waxayna xarun wayn ku leedahay magaaladda Hargeysa.

“Reer Awdal Qaranka Miyey Ka Hadhayaan?” Barnaamijka Xogta Siyaasadda – Waraysi Xildhibaan Tukaale

0

“Reer Awdal Qaranka Miyey Ka Hadhayaan?” Barnaamijka Xogta Siyaasadda – Waraysi Xildhibaan Tukaale

Madaxweyne BIIXI Oo Baasaaboorka Somaliland Ugu Dhoofay MAKKA

0

Hargeysa (Hubaal) – Madaxweynaha Somaliland Md. Muuse Biixi Cabdi ayaa Maanta u ambo-baxay Magaalada Barakaysan ee Makka, si uu halkaa ugu soo guto Waajibaadka Xajka.

Madaxweyne Biixi oo ay tahay markii koowaad ee uu Xajka tagayo inta uu hayo Xilka Madaxweyne-nimo ee Somaliland, ayaa waxa ku wehelinaya xubno ka mid ah Golihiisa Wasiirrada, sida Wasiirka Diinta iyo Awqaafta, Sheekh Khaliil Cabdillaahi Axmed iyo Wasiirka Arrimaha gudaha Md. Maxamed Kaahin Axmed.

Afhayeenka Madaxtooyada Somaliland, Maxamuud Warsame Jaamac oo Saxaafadda kula hadlay Goor dhawayd ayaa sheegay in Madaxweynuhu uu Magaalada Baraysan ee Makka uu ugu safray Baasaaboorka Somaliland.

Afhayeenku wuxuu sheegay in marka Madaxweynaha iyo Masuuliyiinta la socdaa soo dhamaystaan Acmaasha Xajka ay la kulmi doonaan qaar ka mid ah Madaxda Dawladda Boqortooyada Sucuudiga.

Murankii Doorashada Wakiillada Oo Weji Kale Yeeshay, Xildhibaannada Kasoo Jeeda Deegaannada Saddex Gobol Oo Dibedda Uga Baxay Fadhi Golahu Ka Yeeshay Heshiiskii Saddexda Xisbi

0

“Anagoo Ah Xildhibaannadii Gobollada Awdal, Selel, Sanaag, Sool Iyo Buuhoodle, Waxaanu Nahay Xildhibaannadii Ka Soo Jeeday Deegaannadaa, Waxaanu Uga Soo Baxnay Heshiis Ku Sheeg La Yidhi Saddexda Xisbi Qaran Ayaa Ku Heshiiyey Doorashada Golaha Wakiillada

Xildhibaannada Golaha Wakiillada Somaliland Ugu Jira Gobollada Sool, Sanaag-Bari, Awdal, Selel Iyo Buuhoodle Ayaa Dibedda Uga Baxay Fadhi Shalay Golahu Ka Yeeshay Heshiiskii Saddexda Xisbi ee doorashooyinka

Hargeysa (Hubaal) – Xildhibaannada Golaha Wakiillada Somaliland ugu jira Gobollada Sool, Sanaag-bari, Awdal, Selel iyo Buuhoodle ayaa dibedda uga baxay Fadhi Shalay ay Golaha Wakiilladu ku ansixiyeen in laga doodi karo heshiis Saddexda Xisbi Qaran ka gaadheen in Komiishanka doorashooyinka lagu kordhiyo laba Xubnood.

Xildhibaannada Fadhiga dibedda uga baxay oo Warbaahinta la hadlay ayaa sheegay in aanay diiddanayn in doorashadu xilligeeda ku dhacdo, balse ay ka soo horjeedaan in doorashada Wakiillada la galo iyadoon heshiis laga gaadhin Saami-qaybsiga Kuraasta Wakiillada, doonayaana in doodda laga galayo Xubnaha Komiishanka lagu darayo lagu kordhiyo in sidaas oo kale looga doodo duruufaha ku xeeran doorashada Wakiillada, sida Saami-qaybsiga.

Xildhibaan Cali Barre oo ka mid ah Xisbiga KULMIYE, kana mid ah Xubnaha dibedda uga baxay Fadhigii shalay ee Golaha Wakiilladu ku ansixiyey heshiiska Saddexda Xisbi Qaran ee Komiishanka lagu kordhinayo 2-da xubnood ayaa isagoo sababta ay uga baxeen fadhiga Sharraxaya wuxuu yidhi “Anagoo ah Xildhibaannadii Gobollada Awdal, Selel, Sanaag, Sool iyo Buuhoodle, waa dhulbahante, Warsen-geli, Ciise, Samaroon, waxaanu nahay Xildhibaannadii ka soo jeeday deegaannadaa, waxaanu uga soo baxnay heshiis ku sheeg la yidhi saddexda Xisbi Qaran ayaa ku heshiiyey doorashada Golaha Wakiillada.”

Xildhibaanku waxa kale oo uu sheegay “Sidaad la socotaan Doorashada Golaha Wakiillada waxa ku gedaanaa Mushkilado badan oo Siyaasi ah, waxa la isku hayey Saami-qaybsiga iyo in Somaliland Caddaalad ku qaybsato Xildhibaannada Golaha Wakiillada, waxa la isku hayey Kootadii Haweenka oo qolooyinka dibeddu innagu soo abaabuleen, waxa la isku hayey Dhaqaalihii (Doorashada), waxa la isku hayey Diwaangelintii Cod-bixiyeyaasha oo aan weli la qabanin, markii Xilkaa Ciddii lahayd ay gudan wayday iyo Tiro-koobka Dadka Somaliland, Saamigii wax lagu qaybsadana lama ogola, markaa Maaddaama oo la yidhi la isku joojin maayo, waxaanu leenahay la isku joojin maayo Somaliland ka socon mayso.” ayuu yidhi, waxaanu intaa ku daray “Ma ogolin heshiiskaa haddaan saami-qaybsiga si Caddaalad ah loo helin, ama Maxkamad geeya ama meel kale geeya annagu ma galayno haddaan Dadka la diwaangelin.”

Xildhibaan kale oo halkaa ka hadlay ayaa yidhi “Waxaanu maqlaynaa doorashada sidii hore ayaa lagu galayaa, sidaasi Caddaalad maaha mana yeelayno, Annaga oo aan diiddanayn in doorashadu wakhtigeedii ku dhacdo, laakiin horta waa in Saami-qaybsi la helaa..”

Gobollada Awdal, Sool iyo Sanaag-bari ayaa Golaha Wakiillada ku leh 23 Xildhibaan, halka 59-ka kale ay leeyihiin Gobollada Saaxil, Togdheer iyo Maroodi-jeex.

Dawladda Somaliland Oo Lagu Cambaareeyay Maxaabiis Ay Sii Daysay

0

Seychelles, (Hubaal) – Dawladda Seychelles ayaa cambaaraysay talaabada Somaliland ay ku sii daysay 19 maxbuus oo loo xukumay falal budhcad badeednimo ah oo Somaliland oo loo wareejiyey si ay xukunka Seychelles ay ku riday ay ugu dhamaystaan xabsiyada Somaliland. Dawlada Somaliland ayaa maalintii khamiistii sii daysay 19 Maxbuus oo Seychelles ay ku xukuntay 3, 36 iyo 42 sanadood oo xabsi ah ragaasi budhcad badeeda ah. Sanadkii 2011-kii ayaa labada dal ay kala saxeexdeen heshiis isfaham oo loogu soo wareejinayo maxaabiistaasi la xukumay oo ay wada galeen dawladda Somaliland iyo Seychelles. Waxaana sanadkii 2012-kii 19-kaasi Maxbuus ee la xukumay loo soo wareejiyey xabsiga Somaliland halkaas oo ay ahayd in budhcad badeedaasi ay xukunkooda ku dhamaystaan. Dawlada Seychelles oo ah dal ku yaala Jaziirada badda Indian Ocean-ka, ayaa warqad usoo qoray ay ku socodsiinayaan Somaliland, taas oo ay ku cambaaraynayaan talaabadaasi lagu sii daayey maxaabiista aan xukunkooda dhamaysan.

“Cabdiraxmaan-cirro Maalintii Uu Finland Ka Soo Ambabaxayey Hadaladii Uu Yidhi Runtii Waan Ku Diirsadoo Waxaan Is-Lahaa Odaygii Waakaa Tuutaha u Soo Xidhay Sidii Uu Somaliland U Difaaci Lahaa”

0

Wasiirka Warfaafinta Somaliland Oo Tilmaamay In Caarre Yahay Farac Ka Baxay Xisbiga WADDANI

Hargeysa, (Hubaal) – Wasiirka Warfaafinta Somaliland, Maxamed Muuse Diiriye oo maanta warbaahinta kula hadlay magaalada Hargeysa ayaa gudoomiyaha xisbiga Mucaaridka ee Waddani Cabdiraxmaan Maxamed Cabdilaahi Ciro ku eedeeyey in jabhadda uu hogaamiyo Kornayl Siciid Cawil Caarre ay tahay farac ka baxay xisbiga Waddani. Waxaanu ugu baaqay gudoomiyaha xisbiga Waddani inuu qayb ka noqdo waanwaanta lagu doonayo in lagu soo xero galiyo sarkaalkaasi iyo jabhadda uu hogaamiyo.

Wasiirka Warfaafinta Somaliland Maxamed Muuse Diiriyo oo arimahaasi ka hadlay ayaa waxa uu yidhi “Gudoomiye Cabdiraxmaan Cirro maalintii uu Finland ka soo ambabaxayey hadaladii uu yidhi Runtii waan ku diirsadoo waxaan is-lahaa odaygii waakaa tuutaha soo xidhoo sidii uu Somaliland u difaaci lahaa heeganka usoo galay.

Laakiin waxaad moodaa Cabdiraxmaan inaan wax badani u kordhayn, Golaha Wakiilada iyo hawshii uu ka hayn jiray waynu ogayn, xeerarkii iyo wixii digada noqday ee la burburiyey ilaa maanta diifteedii ina hayso waan ogayn, marka dibada cidi ka hadasho ama laga weeraro ama wax laga yidhaahdo kow buu ka yahay cida hadasha, waana ta looga baahan yahay mucaaridka xalaasha ah, waana ta looga baahan yahay muwaadinka wanaagsan, dalkaaga u damqo, oo dadkaaga u damqo, oo marka ay arintu taagan tahay meel halis ah oo dibada ah gondahaaga ha eegin, taasaan anigu kugu boorinayaa, waxa lagaaga baahan yahay raganimo, waxa lagaaga baahan yahay badheedhe,” ayuu yidhi Wasiirka Warfaafinta Maxamed Muuse Diiriye, waxaanu intaasi ku daray isaga oo hadalkiisa sii wata “Waa meelaha la eeganayo Cabdiraxmaan sidaan u filayo ee la tirsanayo ayuu malaha ka mid yahay, Kuma lihi reer ahaan baad iskugu tihiin Caarre wax, laakiin waxaan aqoonsanahay inuu farac isaga ka baxay uu yahay siduu ugu damqanayo oo uu ugu hadlayo, waxaan leeyahay hawl wayn baa kaa saaran, odayaashii oo dhan halkaasay joogaan, salaadiintii halkaasay joogaan, haldoorkii halkaasay joogaan u tag, arintaa iyada ah dawlada sidaad wax ugala qaban lahayd taladeeda keen taasaa lagaaga baahan yahay, anigu faysal Cali Waraabe mar walba waan hambalyeeyaa marka uu hadalayo, ha dhaliilo haduu doonayo dawladda, laakiin waxaan ku hambalyeeyaa qaranka ayuu goorwalba garab taagan yahay.” Ayuu yidhi Wasiirka Warfaafinta Somaliland Maxamed Muuse Diiriye.