Qaramada Midoobay Oo Ka Hadashay Socdaal ergaygooda u qaabilsan Muqdisho & Hargeysa Shalay Ku Yimi Somaliland Iyo Qoddobo Uu Madaxweyne Biixi Kala Hadlay

0
1

Akhri Qoraal Xafiiskoodu Kaga Hadlay Weftiga Danjire Nicholas Haysom Horkacayay ee La Kulmay Madaxweynaha & Arrimaha ay Ka Wada Hadleen

“Ergayga qaramada midoobay ee soomaaliya waxa uu ku sugan yahay magaalada Hargeysa, waxa uu si deg deg ah kulan ula qaatay madaxweynaha somaliland  kaas oo ay ka wada hadleen qoddobo door ah oo ay ka mid yihiin…”

Hargeysa (Hubaal )-Madaxweynaha Jamhuuriyadda Somaliland, Mudane Muuse Biixi Cabdi, ayaa kulan la yeeshay wefdi ballaadhan oo ka socda qaramada midoobay oo uu hoggaaminayo ergayga gaarka ah ee xog-hayaha qaramada midoobay u qaabilsan dalalka Soomaaliya iyo Somaliland, Mr. Nicholas Haysom.

Kulankan uu madaxweynuhu la qaatay wefdiga ka socda qaramada midoobay, ayaa waxa ku wehelinayey madaxweyne-ku-xigeenka Jamhuuriyadda Somaliland, Mudane Cabdiraxmaan Cabdilaahi Ismaaciil (Saylici),  wasiirrada  arrimaha dibadda, Dr. Sacad Cali Shire iyo gudaha, Mudane Maxamed Kaahin Axmed iyo wasiirkii hore ee maaliyadda Somaliland, Ambassador Xuseen Cali Ducaale (Cawil), waxana diiradda lagu saaray arrimo door ah oo salka ku haya xidhiidha Somaliland iyo qaramada midoobay iyo sidii loo joogtayn lahaa ka midho-dhalinta xidhiidhkaas.

Wasiirka arrimaha dibadda Somaliland, Dr. Sacad Cali Shire oo markii kulankaasi dhammaaday warbaahinta la hadlay, ayaa faah-faahiyey waxyaabaha sida gaarka ah ay uga wada-hadleen madaxweynaha iyo wakiilka xoghayaha guud ee qaramada midoobay, waxana isaga oo arrimahaas ka hadlaya uu yidhi, “Waxa laga wada hadlay dhawr arrimood oo muhiim ah oo ay kamid tahay arrinta nabadgelyadu, is-kaashiga qaramada midoobay iyo Somaliland, arrimo la xidhiidha wada-hadalka Somaliland iyo Soomaaliya iyo amuuro kale oo labada dhinacba danaynayeen.”

Ergayga gaarka ah ee xoghayaha qaramada midoobay u qaabilsan Somaliland iyo Soomaaliya Nicholas Haysom oo isaguna si kooban uga hadlay kulanka uu madaxweynaha la qaatay, ayaa si hufan uga mahadceliyey fadhigaas iyo waxyaabaha  ay labada dhinac isla soo qaadeen, waxana uu hoosta ka xarriiqay inuu kulankaasi ahaa mid yididiilo cusub oo midho dhal leh keeni kara.

Geesta kale Xafiiska qaramada midoobay ee soomaaliya ayaa ka hadlay kulankan  dhex maray madaxweynaha somaliland Md Muuse Biixi Cabdi iyo danjire Nicholas Haysom. Xafiiska qaramada midoobay ee soomaaliya oo qoraal uu kaga hadlayo kulanka labada dhinac ku baahiyey bogiisa Facebook ayaa cadeeyey qodobada laga wada hadlay, waxaanu lagu yidhi “ Ergayga qaramada midoobay ee soomaaliya waxa uu ku sugan yahay magaalada Hargeysa, waxa uu si deg deg ah kulan ula qaatay madaxweynaha somaliland Md Muuse Biixi Cabdi, kaas oo ay ka wada hadleen qodobo door ah oo ay ka mid yihiin xidhiidhka ka dhaxeeya somaliland iyo soomaaliya, amaanka iyo horu marka gobolka iyo xiisadihii ugu dambeeyey ee ka dhex abuurmay maamulka Puntland oo daris la ah Somaliland taas oo ka taagan deegaanka Tukaraq ee gobolka Sool.”

SHARE
Article horeAgaasimaha Warfaafinta oo ka Qaybgalay Shir Lagu Falanqeeyey Saxaafadda oo Lagu Qabtay Tanzania
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here