Wasaaradda Diinta oo Wejiga 2-aad ee Diiwaangelinta Maddarasadaha Ka Daah-furtay Gobolka Saaxil

0
1

Gobolka Ku Xigi Doona Oo ay sidoo kale Shaacisey

Berbera(Hubaal):-Wasaaradda Diinta iyo Awqaafta Jamhuuriyadda Somaliland, ayaa maanta magaalada Berbera ka daah-furtay wejiga 2-aad ee diiwaangelinta Maddarasadaha Diiniga ah ee gobolka Saaxil, ka dib markii la dhammaystiray gobolka Maroodi-jeex badhtamaha bishii Maarso 2019-ka.

Agaasimaha guud ee wasaaradda Diinta iyo awqaafta Sheekh Aadan Cabdillaahi Cabdla, Guddoomiyaha gobolka Saaxil Axmed Cismaan Xasan, Isu-duwaha wasaaradda ee gobolka Saaxil, Culimada iyo Maamulayaasha Maddaariska magaalada Berbera, ayaa ka qaybgalay munaasibadda diiwaangelinta oo lagu qabtay xarunta maamulka gobolka ee Berbera.

Waxa uu Agaasime Aadan sheegay inay arrintan wasaaraddu uga dan leedahay in la sugo tayada iyo tirada Maddarasadaha Diiniga ah, maaddaama oo ay barashada diintu waajib innagu tahay, loona baahan yahay in sida ugu habboon uguna fiican carruurta iyo da’yarta kaleba loo baro Qur’aanka iyo culuumta kale ee Diiniga ah.

“Waad ogtihiin diiwaangelintu maddarasaduhu muhiimadda ay u leedahay guud ahaan Qur’aanka barashadiisa iyo tayayntiisa, tabobbarka macallimiintaba. Waxaannu doonaynaa marka maddarasad kasta la diiwaangeliyo, goobtay ku taallo, macallimiinta dhigta, inay waqaf tahay maddarasaddu iyo inay mid gaar ah tahay, dhammaan in xogtaas la keydiyo, waxaannu soo bandhigi doonnaa oo qaybin doonnaa manhajka aannu ugu talogalnay maddarasadaha diiniga ah , kaas oo noqon doona manhaj dhammaystiran oo lagu kabayo ardayda qur’aanka barata,” ayuu yidhi agaasimaha guud ee wasaaradda Diinta Aadan Cabdillaahi, waxaanu intaas ku ladhay; “Berbera waxa xigi doona oo diiwaangelinta Maddarasaduhu ka bilaabmi doontaa afarta bishan xarunta gobolka Togdheer ee Burco, haddii Illaahay idmo…”

Agaasimaha guud, waxa uu ballan-qaaday inay culimada dalka talo ka geysan doonaan manhajka maddarasadaha oo dhammaad ku dhaw iyo in markay dhammeeyaan diiwaangelinta hadba gobolka la dhammaystiro la gaadhsiin doono Kutubta Qur’aanka kariimka ah ee uu Madaxweynaha Somaliland Muuse Biixi Cabdi bixiyey kharashka lagu soo daabacay oo illaa boqol kun oo Kutub ah. Agaasimuhu waxa uu u soo jeediyey Madaxda Maddaariska inay is-diiwaangeliyaan, maaddaama oo wax badan oo waajibaad ah ay dawladda ku yeelanayaan marka la ogaado inta shuruudaha buuxisay.

Guddoomiyaha gobolka Saaxil Axmed Cismaan Xasan, ayaa isaguna halkaas ka hadlay, waxaanu yidhi; “Barnaamijkan diiwaangelinta maddarasaduhu muhiimad weyn buu innoo leeyahay, waayo waa inaynu naqaanno carruurteenna qofka wax u dhigaya aqoontiisa, ilmahaaga ciddaad ku aamminayso in la yaqaannaa aad bay u fiicantay, gobol ahaanna aad baannu u soo dhawaynaynaa diiwaangelinta maddarasadaha.”

Culimada iyo Maamulayaasha Maddarasadaha leh, ayaa iyagu isla maantaba safaf u galay goobta ay diiwaangelintu ka socoto, si ay u diiwaangeliyaan Maddarasadohooda, waxaanay uga mahad-celiyeen Wasaaradda, iyagoo xusay inay soo dhawaynayaan tirokoobkan, si dhawna ula shaqaynayaan wasaaradda heer gobol iyo heer qaran-ba.

“Waxaannu diyaar u nahay oo ballan-qaadaynaa inaannu la shaqayn doonno wasaaradda Diinta. Waxaannu soo dhawaynaynaa hawshan diiwaangelinta oo aannu u aragno mid muhiim ah oo wax badan na tari doonta, abaal baannu ugu hayn doonnaa wasaaradda.” Sidaa waxa yidhi mid ka mid ah Culimada Maddarasadaha Berbera ee diiwaangelintooda la bilaabay.

Masuuliyiinta wasaaradda Diinta iyo awqaafta ee munaasibaddaas ka hadlay, waxaa ka mid ahaa; Agaasimaha Waaxda Horumarinta Dacwadda Haweenka Hodan Cabdi Gaas, Agaasimaha Waaxda Qorshaynta Muuse Gaydh iyo Isu-duwaha, kuwaas oo sheegay inay hawshu si fiican uga bilaabantay gobolka Saaxil.

Diiwaangelinta Maddarasadaha Qur’aanka iyo Culuumta Diinta, ayaa wasaaradda Diinta iyo Awqaafta ka bilawday Hargeysa ee xarunta gobolka Maroodi-jeex 26ka bishii koowaad ee sannadkan 2019-ka, taasoo la dhammaystiray badhtamihii bishii Maarso, halka ay gobolka Saaxil xaruntiisa Berberana ay maanta ka bilaabantay. Waxa ku xigi doona gobolka Togdheer oo ay xaruntiisa Burco ka bilaabmi doonto 3 bishan afraad haddii Illaahay idmo.

Waa markii ugu horreysay ee intii ay Somaliland jirtay tirokoobkan oo kale ay Wasaaraddu samayso, waxaana la gaadhsiin doonaa sida ay Masuuliyiinta Wasaaraddu sheegeen guud ahaan gobollada dalka Jamhuuriyadda Somaliland.

SHARE
Article horeDAAWO: Xukuumadda Oo Ka Hadashay Waaran La Sheegay In Jabuuti Ugu Dhiibtay Ganacsade Geelle
Mustafe Mohammed Abdullahi better known as Mustafe Faro is a senior Somali journalist, writer and cameraman. Mustafe is the head of programmes of Hubaal newspaper - a daily Somali magazine issued from Hargeisa, Somaliland. He is the assistant editor of the Independent Newspaper in Hargeisa, also the assistant editor of Somali Commentator. You can contact him through his E-mail: loodh2013@gmail.com or +252 63 4097497

A REPLY TAGO

Please enter your comment!
Please enter your name here