WEEDHA WARGEYSKA {Dibigii Xareediyo Dooxadu U Buuxdee Dinaahiyey Ee Ciyey, Isagiyo Dibiradii.}

0
95

Falanqeynta Qalinka:

Xildhibaankan oo ka tirsan xisbiga Kulmiye ayaan la garanayn ujeedada uu ka leeyahay hadalada noocan ah ee uu ku durayo guddoomiyaha UCID, hase yeeshee dadka aqoonta u leh ayaa ku tilmaamay in uu ku dayoobay wacyiga siyaasaddeed ee xiligan lagu jiro, isla markaana si uu ula jaanqaado iyo dariiq uu u maro hoggaaminta madaxweyne Muuse food saaro uga dhiganayo. Waxaanu se xasuusnayn, in qofka uu sidan u caayayaa kamid yahay halyeeyada magaca ku leh qarankan, ee uu xataa madaxweynuhu ka marag kacay maamuuskooda. Bal akhriste adiga laftaadu, haddii aad dhageysatay ama aad akhriday amaba aad daawatay, khudbadii madaxweyne Muuse jeediyay Saddexdii bishan oo ku beegnayd xuskii ciidanka qaranka JSL, waxaa uu ka marag kacay miisaanka ay qarankan ku leeyihiin, isagoo ku tilmaamay inay hoggaamiyeyaasha asxaabtu yihiin halyeeyo qaranka abaal ku leh.

 

Ugu dambeyn, ku tiigaali mayno, haseyeeshee aynu milicsano sooyaalka Mr. Blaaki oo kamid ahaa siyaasiyintii dagaalka culus la galay, isla markaana la safnaa, garabkii ka falaagoobay xukuumadda ee inqilaabku ka fashilmay ee ay hoggaaminayeen Xirsi iyo Maxamed Biixi, kuwaas oo geed dheer iyo mid gaabanba u fuulay sidii aanu Muuse Biixi u hananlahayn musharraxnimada xisbiga Kulmiye, ayaa markii ay guusho soo iftay, ee madaxweyne Muuse hantay shacbiyada badan, waxa uu isusoo dhiibay, hoggaanka KULMIYE, isagoo ku cataabay inuu taageeri doono, isla markaana kamid noqon doono kaadiriinta xisbiga ee codka ka keeni doonta deegaankiisa.

 

Sikastooy tahayba, weedhahan qadafka ah ee kasoo yeedhay mudanahan sanqadhu u baxday, waxa ay ka dhigan tahay, murtidii ahayd; {nin ambaday halkuu maray wey ula’ekoonaatay.}

 

Waxa kale oo aynu odhan karnaa, wuxuu ku sifoobay maansadii uu AHU Cabdi Iidaan Deelleeyda kaga qayb galay ee ahayd;

“Dibigii Xareeddiyo

Dooxadu u buuxdee

Dinaahyeeyey ee ciyey

Isagiyo dibbiradii

Duuluulka Karantiyo

Dayrtiyo Jidhaamaha

Dareenkiisu kama foga

Lo’eey dabargo’aagii

Dabadheer abaartii

dariiqyada wadhnaantii

Dawyada tubnaantii

Dabadeed dhulka u dhow

Duunyada u tabar-daran

Dumar seben barwaaqa ah

Subag kaa dudduuciyo

Nacasbaan ku deynine

Kaa durug nin fiicani

 

Afartaa dheh deelley

Dadkaa lagu habaaraa

Ducona waa u dhawdahay

Alla Ku Doori waa maxay

 

Daad kor u socdaa jira

Durdur oomay baa jira

Dabar waashay baa jira

Dameeraaba Weyl dhalay

Sacab timo ma laga deyey

Duqdi nirigti kama gudhin

Isku dununuc reentee

Daawad Gorofka yaw culay

Suaashaasi dawga ah

Danyar cabashadeeda ah

Dulmanaha warkiisa ah

Kacaankana Dansheegiyo

Dawya u tilmaanka ah

Duqu yidhi abwaannada

Dareenkiina soo dhiga

Diqsi ururay baad tiin

Nin deggani ma odhan karo

Duuflaalse mooyaan

Dirxiguba dantiisuu

Qudhunka u dabbaashaa

Waxa taa la derejo ah

ninka soorta duufka ah

dadku nacay isagu cunay

dardarsaday Fandhaallada

Anigaa dushaydiyo

warma danana iyo seef

Dunjigayga lala dhacay

Doofaarka ficil li’i

Naar loogu daayimi

Horta maan dagaallamo

Duqa yidhi ma maqasheen

 

Dul-ka-muummin baa tahay

Uur-ka-Daallin baa tahay

Dibno Kacaana baa tahay

Isha bidixna kuu daban

Dalba-Juuqahaaguna

Wax la dedo ka xeel dheer

Allow yaa ku dooxoo

Haddana aan ku dilinoo

Waxaad damacsantee kale

Debedda ula soo baxa

 

Afartaa dheh Deelleey

Dabray oo ka jeedladay

waxan uga danlee yahay

Dadka reer Jaboutee

Dawladnimada tooda ah

Cidna aan iskaga darin

Waa deris walaalkaya

Dugsi weeye gacalnimo

Anigu waan ku diirsaday

Lama dira-diraalayn

Ha daardaarin waa gobe

Aniguna ma diidani

Dugaagbaa ku shiray meel

Daawana way lahaayeen

Hal dubaaxa buu helay

Waraabii dedaalkiyo

Duqa weyn isaga buri

Darribtii u wada dhigay

Waa kii Dawrigii Aar

Ku dellaley dharbaxada

Inuu dilose ma ahayn

Wuxu yidhi Dayooy hee

Adna Dogob qaroomee

Isku wada darsay tidhi

Wuxu yidhi Dayooy yaa

Daacadnimada kuu dhigay

Dacawadi waxay tidhi

isha Cali ninkii deyey

Digniin wawgu filan tahay

Dibna leef shariir hoo

Dufan jecel dheryaha kari

Diktoor beena sheegtiyo

Afarrey ku daahiyo

Mid Ammaana doontiyo

Dir-cunnooy ha kala tegin

Adiguna Dameeroow

Dawankaaga qaadoo

Higso faraska Doolaal

Dani seeto weeyee

Daba soco ma gaadhide

 

Haddii gabayadii Dura

Salfudaydka lagu daray

Degdegsiinyo weeyee

Mid ka daran ma sheegnaa

Darbanoow Astaadkii

Seyidkii Daraawiish

Kula diriray gaalada

Dar Allee habaarkii

Labaduu is daba dhigay

Dalka yidhi idiin tali

bal darmay ahaayeen

Anuu daaha kama rogin

dadkuse waa yaqaannaa

 

Dabbaal barad caruuriyo

Dhalinyaradu daashaye

kolka daan-cirrooliyo

Raga madaxu Deeb yahay

Dirirta isu soo hadho

Warku daaqsin geel tago

Ninba maaxdi haw dego.

A REPLY TAGO

Please enter your comment!
Please enter your name here