Guriga Blog

“Cuqaashii Ay Xirsi & M. Xaashi u Adeegsan Jireen Ciidagale Oo Xamar Ka Degey Ka Dib Markii Madaxtooyada Laga Soo Xidhay”- W/Q : Garaad Mahad M. Cabdi

0

“Cuqaashii Ay Xirsi & Maxamuud Xaashi u Adeegsan Jireen Ciidagale
Oo Xamar Ka Degey Ka Dib Markii Al-baabka Madaxtoyada Laga Soo Xidhay”- W/Q : Garaad Mahad Maxamed Cabdi..

Laba Caaqil oo a mid ah Cuqaashii Ciidagale ayaa Jilbaab Kaga Dhoofay Madaarka Cigaal International Airport, Iyagoo u Kicitimay Magaalo Madaxda Somalia Ee Moqdisho.

Labadan Caaqil oo kala ah Caaqil Mustafe Maxamed Askar (Girgire) iyo Caaqil Cabdirisaaq Maxamed Askar Waxay Hormood u ahaayeen Cuqaashii Xirsi & Ina Xaashi Ciidagale u Adeegsan Jirey..

Labadan caaqil oo ka mid ah cuqaashii reerka hor boodayay 7-dii sano ee xukuumaddii siiraanyo, waana nimankii  guryaha ka dhistay masaakiintii taarka madaarka laga raray.

Waa niman ku caan baxay hadba halka qadhaabku ka galo, waana niman mabda’ooda shilimo ku ibsada. Kulmiye ayay ahaayeen laakin mabda’ kumay ahayn kaliya qabax qaadasho ayay ku ahaayeen.

Waayo mabda’oodii waxay kaga tageen kadin laga celiyay oo Maxamed kaahin-na ka diiday hawl ay ka rabeen fulinteeda, markaas ayay WADDANI isku shubeen.

Markay tan carabka mariyeen ayay maantana doonayaan inay Xamar-na carabka soo mariyaan, iyagoo Raysalwasaare ku xigeenka Somalia ugu tagay inuu u geeyo Farmaajo & jaaliyadaha Qatar si ay gacanta u soo mariyaan.

Markaan soo ururiyo nimankaa mabda’oodu waxa weeye hunguri iyo afkooda oo ay ku shaqo tagaan.

Waxaanay suuqa gashadeen war odhanaya waxaanu Xamar u tagnay MAG, taas oo aan sal iyo raad toona lahayn.

Waayo haday dhab tahay waxay sii kaxaysan lahaayeen odayaasha reer Oo ay u horeeyaan inanka aabihii iyo adeeradii.

Hore-na umay dhicin MAG Xamar laga soo qaato waayo ninka ku dhinta wuxuu ahaa dameer bakhtiyay..

Markaan duluc-da hadalkayga u soo daadago xaqiiqada safarkani wuxuu daaranyahay xidhiidh ay ka heleen Dawladda Qatar arintaas oo macneheedu yahay mijo xaabinta jiritaanka Somaliland.

Sidaynu ognahay Somaliland waxay saaxiib dhaw la tahay dawladda Imaaradka, imaaraadka iyo qatar-na waxa u dhexeysa xurguf siyaasadeed iyagoo isku haya dano dhaqaale iyo dilaalis qaan-gaadhay.

Sidaa darteed cuqaashan waxay dawladda Qatar u adeegsanaysaa ka shaqaynta arimo lid ku ah qaranimada jamhuuriyadda Somaliland.

Cuqaashani waxay hor dhac u yihiin cuqaal tiro badan oo ka daba tagi doonta, kuwaas oo la mabda’a ah watana fikirka dawladda qatar ee lagu mijo xaabinayo qaranimada Somaliland..

Ugu denbeyn waxaan u soo jeedinayaa Madaxweynaha, wasiirka arimaha gudaha iyo laamaha amaanka inay sharciga mariyaan haddii kale waxay noqon doontaa waddo inagu furantay..

Qore : Garaad Mahad Maxamed Cabdi..

Allaa Mahad leh..

Degmo Cusub Oo Loogu Magac Daray Mujaahid Gacma Dheere Oo Lagu Ansixiyey Kalfadhigii 5aad ee Ay Yeesheen Golaha Deegaanka Hargeysa

0

Waa tuma Degmada Ay Ka Farcantay Degmadan Cusub?

Hargeysa (Hubaal) Waxa shalay soo gabagaboobay Kalfadhigii 5-aad ee Golaha Deegaanka Caasimadda Hargeysa, oo ka qabsoomay xarunta dawladda hoose. Xildhibaannada golaha deegaanka ayaa cod ku ansixiyey degmo cusub oo kusoo biiri doonta 8-da degmo ee caasimada hargeysa ka kooban tahay. Intii Kalfadhigu socday waxa uu Goluhu warbixno ka dhagaystay Maayarka Caasimadda, Sidoo kale wuxuu Goluhu ka dooday.

  1. Shaqada Guddi Hosaadyada Golaha Deegaanka.
  2. Wax ka badalka Tacrifadaha Cashuuraha.
  3. Xeerka Parking-ka caasimadda Hargeysa.
  4. Wax Kabadalka Iyo Kaabista Xeerka Tagaasida.
  5. Xeerka Shaqaalaha DHH.

Intii Kalfadhigu socday waxa uu Goluhu Ansixiyay Habraaca Dhul Bixinta DHH, Sidoo kale waxaa cod gacan taag ah lagu Ansixiyay Xadka Iyo Magaca Degmada 9-aad ee  laga jarayo Degmada Ibraahim Koodbuur ee ay soo Gudbiyeen Gudidii loo Xil saaray ka soo tala bixinta samaynta Degmada Cusub, Waxaana Magaca Degmada laysla gartay in loogu Magac Daro Mujaahid Maxamed Xasan Aadan (Gacma-Dheere) waxaana magaca Degmadu noqonayaa Degmada Gacma Dheere.

Xigasho: Waaxda Warbaahinta Dawladda Hoose ee Caasimadda Hargeysa.

“Caado Uma Lihin In Aan Baaqyada Dhegaha Ka Fureysano, Ma Jirto Cid Aanu Ka Wadahadalnay Mudaaharaadka Joojintiisa”

0

Mucaaradka Somaliland Oo Mar Kale War Ka Soo Saaray Dibadbaxyadii Ay Ku Baaqeen

Hargeysa (Hubaal) Xisbiga Mucaaradka ah ee Waddani ayaa sheegay in ay sii wadi doonaan dibadbaxyadii ay bilaabeen Khamiistii oo aanay joojinayn. Mudaharaadadaas ka dhacay Hargaysa iyo magaalooyin kale oo Somaliland ah ayaa rabshadihii ka dhashay ay dad shacab ahi ku dhinteen kuwa kalana ay ku dhaawacmeen.

Tan iyo maalintaa waxa soo baxayey baaqyo ay dirayeen culimaa’udiinka iyo bulshada qeybaheeda kala duwan ee Somaliland oo ay ku codsanayeen in dibad baxyada la joojiyo oo khilaafka siyaasiga ah lagu dhameeyo wadahadal. Balse gudoomiyaha xisbiga mucaaradka ah ee Waddani Xirsi Cali Xaaji Xasan oo shalay BBC u waramay ayaa sheegay in dibadbaxyadani ay sii socon doonaan.

“Muddaaharaadyadii way sii socon doonaan ma aanan hakin,” ayuu yidhi Mr Xirsi. Waxaa uu intaa ku daray in maalmihii la soo dhaafay ay ku mashquuleen booqashada dadkii ku dhaawacmay iyo aasidda kuwii ku dhintay mudaaharaadkii Khamiistii dhacay. “Waxaanu ku mashquulsanayn labadii cisho ee Jimcihii iyo Sabtidii inaanu dadkii dhaawaca soo booqanno, dadkii la xidhay wax ka ogaano, dadka la aasayana aan aaska kala qeyb galno,” ayuu intaa ku daray.

Gudoomiyaha xisbiga mucaaradka ah ee Waddani Xirsi Cali Xaaji Xasan ayaa dhanka kale sheegay in baaqyada ah joojinta dibadbaxyada aanay jirin cid ula timid oo kala hadashay islamarkana ay dibadbaxyada sii wadi doonaan.

“Caado uma lihin in aan baaqyada dhegaha ka fureysano. Ma jirto cid aanu ka wadahadalnay oo ay noogga timid arrintaasi oo mudaaharaadka joojintiisa aannu ka wadahadalnay oo aanu isla qaadanay,” ayuu yidhi gudoomiye Xirsi.

Mr Xirsi Cali Xaaji Xasan ayaa dhanka kale diiday in ay madaxda mucaaradka qaataan masuuliyadda dadka ku waxyeeloobaya dibadbaxyada.

“Dhibka cidda geysanaysa ee dadkaasi shacabka ah ee boodhadhka iyo siidhiga sita xabadda la dhaceysa baa ka mas’uul ah, dadka in ay xuquuqdooda raadsadaan way u dhintaan wayna u halgamaan, waana xuquuq dastuuri ah,” ayuu yidhi Mr Xirsi.

Muxuu salka ku hayaa khilaafka

Waxaa muddooyiinkii u dambeeyay mar kale sare u kacay khilaafka ka taagan muddeynta doorashada Somaliland, kaasoo u dhexeeya Madaxweyne Muuse Biixi iyo hogaamiyayaasha labada xisbi ee mucaaradka ah.

Dibadbaxyo Khamiistii ka dhacay magaalooyinka waaweyn ee Somaliland ayaa waxa ay isu badaleen rabshado. Dibadbaxayaasha iyo booliska ayaa isku dhacay magaalooyinka qaar waxaana ka dhashay dhimasho iyo dhaawac. Khilaafka ayaa salka ku haya qabashada doorashada madaxwaynanimada maadaama mudda xileedka madaxwayne Biixi uu ku egyahay bisha November ee soo socota.

Arrinta kale ee muranka dhalisay ayaa ah furidda ururada siyaasada ee doorashooyiinka ka qeyb galaya.

Waxaa guldareystay isku dayo badan oo lagu doonayay in lagu dhexdhexaadiyo xisbiyada mucaaradka iyo xukumadda Somaliland.

BAAHIN QANDARAAS: Xafiiska GQQ oo soo Bandhigay Qandaraasyo loo doonayo Dawladda

0
Xafiiska Guddida Qandaraasyada Qaranka Somaliland, wax uu baahinayaa, isla markaana ku wargelinayaa, dhammaan shirkadlayda iyo ganacsatada reer Somaliland ee ka shaqeeya hawlaha dhismaha, Qodidda dhaamam biyoodka iyo hawlaha iibka gaadiidka iyo cid kasta oo danaynaysa u soo bandhigayaa Qandaraasyo Qodid dhaam, iyo gaadiid oo loo doonayo Dawladda.
Faahfaahinta Qandaraasyaduna waa sidan hoos ku qoran:

Madaxweyne Biixi oo Ka Hadlay Bannaan-bixii Mucaaridku Dhigeen iyo Khasaaraha Rabshadihii ka dhashay

0

Hargeysa (Hubaal) Madaxweynaha Somaliland Muuse Biixi Cabdi, ayaa sheegay inay Mucaaradku ku hungoobeen in dad badani u soo baxaan muddaharaaddadii maanta, isla markaana aan muddaharaad dambe dalka laga oggolayn illaa amar dambe.

Madaxweynaha Somaliland oo mar dhawayd hadlay, waxa uu tacsi u diray dadka ku dhintay muddaharaaddadii maanta ka dhacay dalka oo uu sheegay inay shan qof ku dhinteen, ku dhawaad boqol qofna ku dhaawacmeen. Waxaanu masuuliyadda khasaaraha ku eedeeyey Madaxda Xisbiyada Mucaaradka ah ee UCID iyo Waddani.

Madaxweye Biixi ayaa mucaaridka ku eedeeyay inay kasoo horjeedaan horumarka Somaliland, waxaana uu sheegay inay mudaharaadka kusoo beegeen xili ay somaliland ku sugan yihiin wufuud caalamiya oo ka socda dalka Maraykanka, taas oo uu sheegay inay uga dan lahaayeen inay ku xumeeyaan.

Mucaaridka ayaa maanta bannaan-bax ka dhigay qaar ka mid ah magaalooyinka waaweyn ee gobollada dalka, kuwaasi oo markii dambe isku beddelay rabshado ay sababay dhimashada dad gaadhay 5 ruux iyo dhaawa dad ku dhaw boqol.

Qorshe Khatar ku Ah Somaliland Iyo Rag Fulintiisa Xamar Uga Yimid Oo Hargeysa Lagu Qabtay

0

Hargeysa(Hubaal)-Dhawr iyo toban nin oo Xamar diyaarad kasoo raacay ayaa caawa magaalada Hargeysa lagu qabtay, kadib markii uu Sirdoonka Somaliland fashiliyey qorshihii ay u socdeen oo ahaa inay laayaan qaar ka mid ah dadka mudaaharaadaya iyo madaxda bilayska Somaliland marka u socdo bannaan-baxa ay mucaaridku ku baaqeen inuu qabsoomo maalinta Khamiista ee bari.

Nimankan oo la sheegay inay ku tababaranyihiin qoryaha diiradda leh ayaa bilaysku caawa fiidkii ku qab qabteen gurigii ay ku jireen ka dib markii ay warbixin ka heleen hay’adda Sirdoonka Somaliland oo daba socotay qorshaha nimakani maleegayeen.

Wasiirka arrimaha guddaha somaliland, Maxamed Kaahin oo fiidkii warbaahinta la hadlay ayaa xaqiijiyey qabashada raggaas, isagoo dhanka kalena sheegay inay hayaan caddeymo baadhitaan oo raadkeedu galay musharaxa madaxweyne ee xisbiga Waddani Cabdiraxmaan-cirro, isla markaana ay soo bandhigi doonaan.

guddoomiye Shiiloo fariin u diray bulshada caasimada, gaar ahaan Degmada 26-june

0

Hargeysa (Hubaal) Guddoomiyaha degmada 26-june ee xisbiga Kulmiye, Muxiyadiin Cabdi Shiil ayaa dhammaan bulshada ku dhaqan hargeysa, gaar ahaan degmadaasi ugu baaqay inaanay ka qayb qaadan mudaharaadka ay mucaaridku ku baaqeen berrito oo khamiis ah.

Guddoomiye Muxiyadiin ayaa sidoo kale taageeray isla markaana isbarbar taagay, go’aanka xukuumaddu ka qaadatay mudaharaadka mucaaridku iclaamiyeen berri khamiista, kaas oo asxaabta mucaaridka lagu faray inay ku qabsadaan keliya goobaha dawladdu u cayintay, isla markaana ay sharcidarro tahay in aan dariiqyada iyo ganacsiga kala duwan ee ka jira caasimada la xidhi karin.

“waxan halkan fursadayda uga faa’ideysanayaa, inaan la wadaago bulshada degmada caasimada hargeysa, gaar ahaan degmada 26-june, inaanay ka qayb gelin bannaan-baxyada aannu mucaaridku dusha u ridan doonin wixii dhibaato ka yimaada, isla markaana bulshadu ku dedaasho adkeynta nabadgelyada oo ay dhan uga soo wada jeestaan.” ayuu yidhi guddoomiyaha degmada 26-june ee xiga talada haya ee Kulmiye oo goordhaweyd la hadlay wargeyska madaxa-bannaan ee Hubaal.

“Xirsi Dawladdii Siilaanyo Waxa Uu Ahaa Raggii Lahaa Ma Suurtaa La Afuufayaa Hadday Doorasho Dhici Weydo, Wuxuu Ahaa Raggii Mudaharaadka Kasoo Horjeeday”

0

Taliye Dabagale Oo Soo Faqay Falal Buugga U Galay Oo Uu Ku Kacay Guddoomiye Xirsi Axdigii Siilaanyo Iyo Kii Daahir Rayaale

Hargeysa (Hubaal)- Taliyaha Ciidanka Booliska Somaliland Sareeye Gaas Maxamed Aadan Saqadhi (Dabagale), ayaa waxaa uu soo faqay taariikhda madow ee Guddoomiyaha Xisbiga mucaaradka ah ee Waddani Xirsi Cali Xaaji Xasan. Taliye Maxamed Aadan Saqadhi (Dabagale) oo shalay shir jaa’id ku qabtay magaalada Hargeysa, ayaa sidoo kale soo bandhigay falal uu xilliyo hore ku kacay Guddoomiye Xirsi xilligii uu ahaa Wasiirka Madaxtooyada ee Xukuumaddii Axmed Siilaanyo.

Waxaa uu Taliyahu taxay waxyaabo uu sheegay in guddoomiye Xirsi sameeeyay xilliyo hore, isagoona ku eedeeyay in uu ahaa ninkii ugu horreeyay ee gabadh Maxkamad soo taaga, islamarkaana ahaa ninkii iska casilay Komishanka doorashooyinka si Doorashooyinkii wakhtigaasi u fashilmaan. “haddaba xirsi waa kuma, guddoomiyaha xisbiga mucaaridka? Waxaan doonayaa maanta si naloo kala saaro, xirsi dawladdii tan ka horreysay ee Kulmiye waxa uu ahaa raggii ugu awooda badnaa, ragga go’aamada ugu waaweyn gaadhi jiray buu ahaa, anigu dawladda ayaannu kuwada jirnay. Doorashadii 2008-dii xubnihii komishenka ayuu madax ka ahaa, wuu iska casilay si ay doorashadaasu ay khalkhal u gasho,mar labaadkii isla 2008-dii Xirsi waxa uu abuuray jabhad hubaysan, baabuur buu qoryo saaray, ciidan buu la baxay, dawladdii Daahir rayaale ee xiligaas jirtay wuu ka hor yimid. Wuxuu ciidanka boolisku soo qabtay isagoo hawshaas ku jira ayaa gacanta lagu soo dhigay oo lasoo xidhay. Markii saddexaad dawladdii Siilaanyo xiligii ugu danbaysay markii danihiisu ay ka dhammaadeen, wuxuu isku dayay inuu inqilaab ku sameeyo isagoo xubintii ugu xoogga weynd ah, 12 xubnood (wasiir) baa iska casilay fikradana isagaa lahaa oo dawladaasi dirqi bay ku badbaaday. 2014-kii waxa uu ahaa raggii u doodayay kordhintaa uu maanta kasoo horjeedo ee ay baarlamaanka isku qabsadeen ee xataa halhaysaha la baxay, sankay caano ka keeni iyo wax lamida, isagoo leh ma cirkaa soo dhacaya iyo ma suurtaa la afuufayaa hadday doorasho dhici weydo. Raggii mudaharaadka kasoo horjeeday waqtigaa ayuu ahaa.” Ayuu yidhi jananka ciidanka booliska Somaliland oo shalay warbaahinta kula hadlay magaalada hargeysa

SOMALILAND: Madaxweynaha Oo Kulan La Yeeshay Salaadiintii Ugu Badneyd Ee Kasoo Jeeda Beesha Bariga Burco

0

Akhri Magacyada 21 Hoggaan-dhaqameed Oo maanta Madaxweynuhu Ku Qaabiley Madaxtooyada Iyo Ujeedada Kulankaasi Daarnaa

Hargeysa –(Hubaal) Madaxweynaha Jamhuuriyadda Somaliland Md Muuse Biixi Cabdi, ayaa qasriga madaxtooyada ku qaabiley 21 suldaan oo ka mid ah madax-dhaqameedka beelaha gobollada Togdheer, Sanaag, Saraar iyo Saaxil oo uu madaxweynuhu martiqaaday.

Sida lagu sheegay war qoraal ah oo lagu baahiyey bogga Facebook ee Afhayeenka Madaxtooyada Somaliland, waxa kulanka lagaga wadahadlay qodobbo ay ka mid yihiin horumarka dalka, nabadgelyada iyo xaaladda waddanka.  Kulankaasi wuxuu soo dhammaaday is-afgarad iyo jewi wanaagsan.

Waxa kulanka madaxweynaha ku wehelinayey wasiirrada wasaaradaha Arrimaha Gudaha, Horumatinta Biyaha, Horumarinta Caafimaadka, Caddaaladda, Xidhiidhka Goleyaasha iyo Arrimaha Dastuurka, Wasiir-ku-xigeenka Arrimaha Dibedda iyo Iskaashiga Caalamiga ah iyo Guddoomiyaha Hay’adda Qaxoontiga iyo Barakacayaasha.

Magacyada salaadiinta Madaxweynuhu la kulmay waxa ay kala yihiin:

  1. Suldaan Maxamuud Guuleed Mire
  2. Suldaan Siciid Yuusuf Ducaale
  3. Suldaan Maxamuud Xaaji Xuseen
  4. Suldaan Sh. Yuusuf Cabdi Cawad
  5. Boqor Maxamuud Cali Carab
  6. Garaad Cali Axmed Xirsi
  7. Suldaan Mustafe Maxamed
  8. Suldaan Cabdiraxmaan Qodax
  9. Suldaan Cabdiraxmaan Abyan
  10. Suldaan Axmed Faahiye
  11. Suldaan Axmed Xasan
  12. Suldaan Cali Jaamac Galaal
  13. Suldaan Abokor Cumar Aadan
  14. Suldaan Maxamed Aadan
  15. Suldaan Maxamed Axmed
  16. Suldaan Ibraahim Cige
  17. Suldaan Cabdirisaaq Cummaani
  18. Boqor Cabdillaahi Xaaji Xasan
  19. Suldaan Maxamed Cali Jabbaan
  20. Suldaan Barkhad Cabdi Shaybe
  21. Suldaan Maxamed Jaamac Ciise.

“Tv-Yadii Waxannu U Nacnay Oday Badhaacinaya Iyo Nin Iska Hadlaya Oo Maba Daawano, Walaahi In Aannaan Ogeyn Inay Mudaharaad Ku Baaqeen Iyo Inkale Midna”

0

“Kuwa Aannu Hoggaanka Dalka U Dhiibaynay, Labaduba Waxay Ka Hadleen Danahooda, Wax Danta Shacabka Ka Hadlay Weli Ma Hayno Xukuumad Iyo Mucaaridba.” Dareenka mid ka mid ah Bulshada Hargeysa ku dhaqan

Hargeysa (Hubaal) Bulshada ku dhaqan magaalada hargeysa oo aragtidooda ka dhiibanay hadallada kasoo yeedhay xisbiyada mucaaridka ee ku aaddan bannaan-bax laysugu soo baxo dhammaan dalka, ayaa badiba bulshadu waxa ay wax aad loola yaabo ku tilmaameen dhawaaqaasi mucaaridka kasoo yeedhay. Qaar ka mid dadweynaha ayaa sheegay inay dhibsadeen oo ay naceen tv-yada maxaliga ah ee inta badan soo gudbiya dhawaaqyada dhiilada ah ee kasoo yeedha mucaaridka, halka qaar ay walaac xoogan ka muujiyeen masuuliyiinta dalka ee doonaya inay dalkan hoggaamiyaan, kuwaas oo ay ku tilmaameen kuwo keliya ka hadla danahooda oo aan haba yaraatee soo hadal qaadin danta shacaku qabo, hadday tahay xukuumad iyo mucaaridba.

“lama kala laha dalka ee waa lawada leeyahay. Tv-yadii waxannu u nacnay oday badhaacinaaya iyo nin iska hadlaaya oo maba daawanaba. Walaahi baanaan ogeyn inay mudaharaad ku baaqeen iyo inaanay ku baaqin midna. Kuwii aannu hoggaanka dalka u dhiibaynay, labaduba waxay ka hadleen danahooda, wax danta shacabka ka hadlay weli ma hayno xukuumad iyo mucaaridba. Sidaa waxa yidhi qaar ka mid ah bulshada ku dhaqan magaalada hargeysa oo ka dareen celinayey dibedbaxyada mucaaridku ku baaqay, kuwaas oo telefishenka Hctv la  dhexqaaday mikrafoonka maanta.

Mucaaridka Somaliland ayaa maanta soo saaray baaq ay ku iclaaminayaan bannaan-baxyo ballaadhan oo ay sheegeen in dhammaan guud ahaan dalka ay qaban doonaan.

Arrintan ayaa ku soo aadaysa, xili dalka ay ka jirto xaalad nololeed oo adag oo ay qaabilayaan shacabka reer Somaliland, kuwaasi oo la daalaadhacaya sicir-bar maciishadeed iyo xaalad abaareed.

Hargeysa Book Fair: Daah-furka Bandhigga Caalamiga ah ee Buugaagta Hargeysa oo 15-jirsaday iyo Xiisaha Sannadkan ku duugan

0

Hargeysa (Hubaal) – Madaxweyne ku-xigeenka Somaliland Md Cabdiraxmaan Cabdilaahi Ismaaciil (Saylici), ayaa Sabtida maanta magaalada Hargeysa ka daah-furay toddobaadka Bandhigga Caalamiga ah ee Buugaagta (Hargeisa International Book Fair), waxaanu bandhiggu socon doonaa muddo lix maalmood ah laga bilaabo 23-ka ilaa 28-ka bishan July, iyadoo muddada uu socdo lagu soo bandhigi doono barnamijyo kala duwan.

Bandhigga Caalamiga ah ee Buugaagta Hargeysa oo 15-jirsaday, waxa sannad kasta hal-ku-dheg looga dhigaa mawduuc cusub oo xambaarsan danaha guud ee Qaranka Somaliland halka sidoo kale bandhig kasta lagu soo marti-qaado Waddan gaar ah

 

Bandhigga 15aad ee Carwada Buugaagta Hargeysa oo saaka ka furmay Xarunta Dhaqanka ee Hargeysa, ayaa sannadkan hal-ku-dheg looga dhigay “Wada-jirka”, halka martida gaarka ah ee sannadkan lagu soo sharfay noqday waddanka Senegal oo agabkiisa hiddaha iyo dhaqanka iyo taariikhdiisa dhaqan ee uu leeyahay lagu soo bandhigi doono maalinta Berri , waxaana ka soo qeybagalay Wefti ka socda waddankaas.

 

Daah-furka Bandhigga oo sannadka kasta lagu soo bandhigo buugaag kala duwan iyo farshaxanno waxa goob-joog ka ahaa Madaxweyne Kuxigeenka Somaliland, Wasiirrada Wasaaradaha Arrimaha Dibadda, Warfaafinta, Dastuurka, Maayarka Hargeysa, wufuud ka kala socotay dalalka Caalamka, dublomaasiyiin, Ganacsato, Abwaanno, Qorayaal, farshaxanno iyo dadweyne aad u tiro badan oo isaga kala yimi gobollada dalka.

Guddoomiyaha Xarunta dhaqanka Hargeysa, ahna Aasaasaha Carwada Caalamiga ah ee Buugaagta Hargeysa Dr. Jaamac Muuse Jaamac oo ugu horeyn munaasibadda ka hadlay, ayaa soo bandhigay marxaladihii kala duwanaa ee uu soo maray Bandhigga Buugaagta Hargeysa iyo muhiimadda uu Qaranka ugu fadhiyo.

 

“Ku soo dhawaada 15-guurada bandhigga caalamiga ah ee buugaagta Hargeysa. Waa 15-sannadood oo la dareemay faa’idada uu u keenay qarankan iyo umaddan Somaliland oo sannad kasta lagu soo bandhigayey mowduucyo kala duwan oo xambaarsan danaha Qaranka. Waa 15 sannadood oo maanta hana-gaadh ah, suurto-galisayna madal midaysay umaddan ciddii u soo fekertay,” sidaas ayuu yidhi Guddoomiye Dr Jaamac Muuse Jaamac.

Maayirka Caasimadda Hargeysa Cabdikariin Ahmed Mooge ayaa isagoo ku hadlayey magaca caasimadda soo dhaweeyey wufuuddii ka kala socotay caalamka ee ka qayb-galay Bandhiga Caalamiga ah ee Buugaagta Hargeysa, waxaanu bogaadiyey doorka ay ku leedahay horumarka Dhalinyarada.

Professor Siciid Saalax oo ka mid ah suugaan-yahanka iyo af-yaqaanka Soomaalida ayaa sharxay muhiimadda bandhiga Buugaagtu u leeyahay bulshada iyo is-dhexgalka dadka iyo dalalka deriska ah, isagoo ka sheekeeyey qiimaha ay lahaayeen hal-ku-dhegyadii hirgalay ee lagu suntay Bandhigga Caalamiga ah ee Buugaagta Hargeysa 15-kii sanno ee u dambeeyey.

Maamulaha guud ee Shirkadda Dahabshiil Cabdirashiid Maxamed Siciid oo ka mid ah ganacsatada lagu soo marti-qaaday Bandhigga, ayaa yidhi, “Dahabshiil haddaanu nahay waxaanu u aragnaa haddii la mideeyo Dhaqanka iyo dhaqaalaha in umaddu horumar samayn karto, waayo dhaqanku waa ka dadka isu soo dhaweeya, ganacsataduna meel walba way tagaan.

Madaxa Xafiiska dublomaasiyeed ee Dowladda boqortooyada Ingiriisku ku leedahay Hargeysa, Lizzi Brown, ayaa dhankeeda xustay muhiimadda uu bulshada u leeyahay bandhigga Buugaagta Hargeysa oo ay ku tilmaantay madal muhiim ah oo kulmisay xirfad-yahanno iyo Aqoonyahanka dalka, waxaanay halkaan ka ballan-qaadday inay dowlad ahaan taageerayaa horumarinta akhriska iyo Qoraalka oo ay ku tilmaantay muhiimadda ugu weyn ee bandhiggani leeyahay.

Safiirka dowladda Taiwan u fadhiya Somaliland Allen Chengwa Lou, ayaa dhankiisa ka dareen-celiyey sida uu u arko Bandhigga Caalamiga ah ee Buugaagta Hargeisa, waxaanu xusay inay Somaliland iyo Taiwan kawada shaqeyn doonaan carwooyin iyo bandhigyo kuwan oo kale ah.

 

Wasiirka Wasaaradda Arrimaha Dibadda ee Somaliland Dr Ciise Keyd Maxamuud, ayaa sheegay inay dowlad ahaan bogaadinayaan cid kasta oo qayb ka ah qaban-qaabada iyo suurta-galinta qabsoomidda Carwada Caalamiga ah ee Hargeysa, isagoo si weyn u soo dhaweeyey taageerada ay ka geystaan saaxiibbada Somaliland ee Caalamka.

 

Wasiirka Warfaafinta, Dhaqanka iyo wacygelinta Somaliland Saleebaan Yuusuf Cali Koore, ayaa dhankiisa bogaadiyey doorka Bandhigga Buugaagta Hargeysa ka qaato iib-geynta Qadiyadda madax-bannaanida iyo Aqoonsi-raadinta Somaliland, waxaanu maamulka xarunta Dhaqanka ee Hargeysa ku ammaanay heerka ay soo gaadhsiiyeen iyo horumarka ka muuqda Bandhigga Caalamiga ah ee Buugaagta Hargeysa.

 

Madaxweyne Kuxigeenka Somaliland Md.Cabdiraxmaan Cabdilaahi Ismaaciil Saylici (SAYLICI) oo si rasmi ah u daah-furay bandhigga 15aad ee Carwada Hargeysa, ayaa si weyn u ammaanay doorka wax-qabad ee Guddoomiyaha Xarunta Dhaqanka Hargeysa iyo muhiimadda ay qaranimada u leedahay Bandhigga Caalamiga ah ee Buugaagta Hargeysa.

 

“Aad iyo aad ayaan ugu hambalyeynaynaa Jaamac Muuse Jaamac iyo hawl-wadeennada inay joogteeyaan muddo 15 sanno ah. Hay’ad kasta oo la bilaabo wakhti ayay qaadataa, laakiin waxa kaliya ee aynu ku qiimayn karnaa muddada ay jirto iyo sida loo joogteeyo. Waxa aad u muhiima in 15-kaas sanno oo joogto ah halkaas la soo gaadhsiiyo oo ay noqoto hay’ad qaranka gudihiisa wax weyn ka tarta oo dhiirri-gelisa akhrista iyo dhalinyarada,” sidaas ayuu yidhi Madaxweyne ku-xigeenka Somaliland oo Bandhigga Bugaagta ee Hargeysa ku tilmaamay barnaamij indhaha caalamka ku soo jeediyey Somaliland.

 

Bandhigga Caalamiga ah ee Buugaagta Hargeysa (Hargeisa International Book Fair) oo muddo toddobaad ah ka socon doonta xarunta Dhaqanka ee Hargeysa, ayaa ah munaasibad-dhaqameed sannad kasta lagu bandhigo Arrimo khuseeya dhaqanka, buugaagta, suugaanta, bandhig-faneed iyo aqoon-wadaagis loo soo bandhigo wufuud ka socota in ka badan 30 dal oo sannad walba lagu soo marti-qaado.

 

Carwada caalamiga ah ee Buugaagta Hargeysa, ayaa sannad kasta si gaar ah loogu maamuusaa mid ka mid ah waddamada caalamka oo dhaqankiisa iyo hiddihiisa wax laga barto, waxaana loo asteeyaa mowduuc gaar ah oo sannad kasta  hal-ku-dheg looga dhigo bandhigga.

 

Waddanka Ethiopia ayaa ahaa martida gaar ah ee lagu maamuusay bandhiggii ugu dambeeyey carwada caalamiga ah ee buugaagta Hargeysa oo la qabtay sannnadkii hore, waxaanu bandhiggaas ku lifaaqnaa bandhiggii carwada ee sannadkii 2020-kii oo u baaqday saamaynta uu adduunka ku yeeshay cudurka Covid-19.

 

Markii u horeysay ee la bilaabay barnaamijka martida sannadkan ee Bandhigga ahayd sannadkii 2012-kii waxa marti ku ahaa dalka Jabuuti, halka sannadihii ku xigay ee 2013-kii ilaa 2018-kii ay marti ku ahaayeen dalalka Boqortooyada Ingiriiska Malawi, Nigeria, Ghana, South Africa iyo Rwanda.

 

Bandhigga Caalamiga ah ee Buugaagta Hargeysa oo ay soo qaban-qaabiso Xarunta Dhaqanka Hargeysa iyo Ururka Redsea Culutural Foundation, ayaa markii ugu horreysay lagu qabtay magaalada Hargeysa sannadkii 2008-dii, waana Bandhigga ugu ballaadhan ee Buugaagta ee waddamada Geeska Afrika lagu qabto.